Tu nge thlan awm ber chu ni ta ; Lukaku nge Morata nge Belotti?

Kumin hi nipui transfer-a sum hman tamna ber tura ngaih a ni a, club hrang hrangin team thuam chak nan sum an theh chhuak hnem tawh hle. Football-ah chuan inkhel danglamna chu goal a nih miau avangin striker hlutna a sang a, kumin transfer ngaihnawmna tak pawh a ni.

Premier League champion Chelsea leh Europa League champion Manchester United-in goal khung thei player an inchuh a, tun ṭumah hi chuan an khelhna tur lam ni loin club lian tam takin an kawr ha tura an duh player langsar pathum Romelu Lukaku, Alvaro Morata leh Andrea Belotti te kan belchiang dawn a ni.

Romelu Lukaku

Romelu Lukaku hian kum nga chhung a zawnin Premier League-ah season tinin goal 10 emaw a aia tam a khung tawh a, season liam ta kha league bika a khung hnem ber

ṭum niin Everton tan goal 25 a khung.

Kum 24 mi Lukaku hi ke vei lama pet thiam a ni a, ke dinglam pawh hmang thiam tak a ni a, feet ruk leh inches thuma sang a nih avangin boruakah a ṭha tel bawk.

Lukaku hian league-ah goal 29 khungtu Harry Kane chiah a pha lo. Belgian striker hian goal 25 a khung zinga goal 12 chu a ke vei lama a khung a ni a, a ke dinglamin goal sarih khungin a lu hmangin goal ruk a khung. Ke vei lamah hian amah hnaih bertu Kane-a'n goal sarih chiah a khung a, lu hmanga goal khung tam lamah erawh pahnihna niin Fernando Llorente leh Christian Benteke te goal khat chiahin a pha lo.

Goal 25 a khung bakah Lukaku hian a

ṭhiante goal khung tur vawi ruk a siam a, pass ṭha bik vawi 40 a nei tel. Goal nawr kawngah player ṭha bik a nih zia chu statistics-in a sawi fiah a, chutihrualin Belgian striker hi club lian laka goal khung a harsat avangin a famkim bik lo a. Champions League-ah sulhnu la nei loin Europe inelna sanga bera khelh a châk avanga Everton chhuahsan tur a ni a, Europa League lamah erawh 2014-15 season khan top scorer a ni tawh thung.

Kum 24 mi lek ni chungin ram tan vawi 57 a khel tawh a, goal 20 a khung tawh, inelna lian 2014 FIFA World Cup leh UEFA Euro 2016-ah te khan a inlan a ni.

Alvaro Morata

Alvaro Morata hi Real Madrid aṭanga inzir chhuak a ni a, Spanish club bakah hian Italy-a rorel mektu Juventus tan a khel tawh a, club lian pahnih tana sulhnu ṭha hnut chhiah thei a nihna hi a itawmna tak chu a ni.

Spanish striker hian season liam ta khan league-ah goal 15 a khung a, khelmuala a hun hman zat ngaihtuah chuan ṭha tak a ni. Morata hi vawi 26 chiah a inlan a, chung zinga vawi 14-ah inkhel bul ṭanin vawi nga chiah a khel tluan a, vawi 12 dang chu bench aṭangin a lut.

Ke dinglam hmang thiam striker hian goal 15 a khung zinga goal riat hi a ke dinglamin a khung a, a lu hmangin goal ruk khungin a ke vei lamin goal khat a khung bawk. Lukaku ang thoin team lian lakah goal a khung tam tawk lo tihin sawisel mah se match pawimawh chuan goal a khung. Morata goal khung vang liauin liauin Real Madrid-in point 13 an hlawh chhuak a, season liam taa league an champion theihna chhan a ni.

Morata hming chherna tak erawh Real ni loin season hnih chhung a khelhna Juventus a ni a, Italian club hi Serie A leh Copa Italia-ah vawi hnih a champion pui. Juventus-a a season khatnaah Morata hian Champions League final thlen puiin semfinal-a Real Madrid an hneh ṭumin first leg leh second leg-ah goal a khung ve ve a, hei hi Spanish club-in an lak let chhan a ni a, Karim Benzema nek chhuak zo lo mah se Morata hian theihna sang tak a nei a ni.

Andrea Belotti

Striker pathuma hming langsar lo ber Andrea Belotti hian season liam ta khan Torino tan Serie A-ah goal 26 tehmeuh a khung a, Roma forward Edin Dzeko (29 goals) leh Napoli forward Dries Mertens (28) te chiah a pha lo.

Italian forward Belotti hi Juventus forward Gonzalo Higuain (24) te aia goal khung tam thei a nihna avangin a theihna a sang tih a hriat theih a, a finishing ṭhatna te, boruakah a ṭhatna te leh tlarhnung lam a puih theihna hi an fakna a ni.

Belotti hian goal 26 khung tur hian a ke dinglam (11), vei lam (5) leh lu (10) te a hmang vek a, assists pawh vawi sarih neiin pass ṭha bik vawi 48 a nei bawk. Kum 23 mi striker hian hmabak a nei êng a, Lukaku leh Morata te aia a thlanawm lohna erawh fiahna tak tak a la paltlang lo.

Torino striker hian Italy tan vawi 20 a inlan tawh a, goal li khung ve tawh mah se inelna lian a la hmachhawn lo. Club lian tan rinrawl bera hman nghal atan Belotti hi a la iaiawm deuh a, amaherawhchu a thlen chin erawhin club lian beng a thleng phak tawh tih erawh chiang e.

Romelu Lukaku
D.O.B : 13 May 1993 (K-24)
Height : 6 ft 3 in
Kum Club Pld(Gls)
2009-2011 Anderlecht 73 (33)
2011-2014 Chelsea 10 (0)
2012-2013 West Bromwich Albion (loan) 35 (17)
2013-2014 Everton (loan) 31 (15)
2014- Everton 110 (53)
National Team
2008 Belgium U15 4 (1)
2011 Belgium U18 1 (0)
2009 Belgium U21 5 (1)
2010– Belgium 57 (20)
Alvaro Morata
D.O.B : 23 October 1992 (K-24)
Height : 6 ft 2 in
Kum Club Pld(Gls)
2010-2013 Real Madrid B 83 (45)
2010-2014 Real Madrid 37 (10)
2014-2016 Juventus 63 (15)
2016- Real Madrid 26 (15)
National Team
2009 Spain U17 6 (2)
2010 Spain U18 2 (3)
2010–2012 Spain U19 13 (11)
2013–2014 Spain U21 13 (13)
2014– Spain 20 (9)
Andrea Belotti
D.O.B : 20 December 1993 (K-23)
Height : 5 ft 11 1/2 in
Kum Club Pld(Gls)
2012–2013 AlbinoLeffe 37 (14)
2013–2015 Palermo 62 (16)
2015– Torino 70 (38)
National Team
2011–2012 Italy U19 6 (2)
2012–2013 Italy U20 9 (4)
2013–2015 Italy U21 18 (9)
2016– Italy 9 (4)