Djokovic leh Federer chak nuamsa

Roger Federer leh Novak Djokovic tan Wimbledon third round lut turin harsatna lian­tham a la awm lo. Ningani zan khan seeded pahnihna Djokovic-a'n Adam Pavlasek a hneh a, Swiss star Federer hian Dusan Lajovic hnehin second round a paltlang ve bawk.

Court One-a inkhelah Djokovic hian darkar khat leh minute 34 chhung lekin 6-2, 6-2, 6-1 in hnehna a chang a, double fault vawi khat chiah a nei. Winners vawi 26 vuain unforced errors ṭum 18 a nei a, Grand Slam hmasa Australian Open leh French Open nena khaikhin chuan a tihsual avanga a khingpuite point hmuh a tlahniam tawh hle a ni.

Coach lailawk Andre Agassi leh Mario Ancic te kaihhruaina hnuaia khel Djokovic chuan, "Wimbledon ṭan hma khan Eastbourne-ah ka inkhel hah hle a, tuna tan chuan set thum khelh hi ka tan a tawk rih hle. Vawiin chu a tir aṭanga a tawp thleng mai khan duhthusama ṭhain ka khel a, third round-ah pawh hetiang bawk hi a nih leh ka beisei," tiin a sawi.

Kum 30 mi Djokovic hian world number 489 Ernests Gulbis a hmachhawn leh ang. Gulbis hian mipui ṭan hlawh Juan Martin del Potro chu rin loh tak maiin 6-4, 6-4, 7-6 (7-3) in a hneh a ni.

Latvia tlangval Gulbis hian hliam a nei ngun hle a, a inkhelh chhunah pawh a khel ṭha ngai lo. Nikum Roland Garros hnua tun ṭum hi inelna lian a hmachhawn lehna hmasa ber a ni a, Grand Slam nomawi chawi tawh Del Potro a hneh theih avangin Djokovic tan fimkhur a ngai ang.

Federer nge nge

Centre Court-a inkhelah Federer hian 7-6(0), 6-3, 6-2 in Lajovic a hneh. Federer hian a service hmasa ber a hloh avangin set hmasa berah 2-0 in a hnufual a, mahse hun pawimawhah che fuh chho lehin set hloh loin hnehna changtu zawkah a ṭang.

Grand Slam vawi 18 cham­pion tawh Federer hian third round-ah chuan seeded 27-na Mischa Zverev a hmachhawn ang. Germany tlangval hian darkar thum leh minute nga chhungin Mikhail Kukushkin chu 6-1, 6-2, 2-6, 3-6, 6-4 in a hneh ve thung a ni.

Thla hmasa khan Federer leh Zverev te hi an lo inhmachhawn tawh a, Swiss star hian Gerry Weber Open nomawi a vawi riat nana chawi turin hnehna a chang - tun ṭumah pawh hian rinkai zawk a ni leh ang.

Kum 35-a upa Federer chuan, "Grass-ah chuan chetfuh loh laklawh chuan insiamṭhat thuai a harsa thei hle. Lajovic pawh khan min chhaih buai hman hle, third round-ah chuan bul ṭan fuhtu zawka ṭan a pawimawh hle ang," tiin a sawi.

Inkhel dang

Tennis tournament upa ber Wimbledon khelh mekah rinkai player an la chak chho zel, seeded parukna Milos Raonic, Dominic Thiem leh Alexander Zverev te pawhin hnehna changin third round an lut vek.

Season hmasa finalist Raonic-a'n darkar hnih leh minute 40 chhungin Mikhail Youzhny chu inkhel inhnehtawk takah 3-6, 7-6 (9-7), 6-4, 7-5 in a hneh. Canadian tlangval Raonic hian third round-ah chuan Albert Ramos Vinolas a hmachhawn leh dawn a ni.

Tun season-a khel ṭha tluang tak Thiem chuan French tlangval Gilles Simon 5-7, 6-4, 6-2, 6-4 in a hneh. Thiem hian Alexander Zverev a bitum leh ang. Mischa-a unaupa Alexander hian second round inkhel dangah Frances Tiafoe chu 6-3, 6-4, 6-3 in a hneh ve thung a ni.