Malawi-ah football vanga chhiatna

Africa khawmualpuia ram pakhat Malawi-ah chuan inkhel en tum mipui an innek buai avangin mi pariat an thi a, an zinga pasarih hi naupang an ni. Bingu National Stadium-a chhiatna thlengah hian mi engemaw zatin hliam an tuar bawk.

Lilongwe khawpuia chhiatna thlengah hian an ram club langsar Nyasa Big Bullets leh Silver Strikers-te chu Britain sorkar rorelna hnuaia an ram zalen 53-na lawm nan friendly match khel tura tih an ni a, en man a awm lo.

Mipui 40,000 lenna stadium-ah hian inkhelh ṭan hun tura tih aia darkar thuma tlaiin inkhel ṭan a ni a, inkhelh ṭan hun tur hisapa thleng hma mipui sang tel chuan gate hawn loh a ni reng chu hrethiam loa nawrin chhiatna hi a thleng chhunzawm ta a ni.

Mi pariat laiin nunna an chan chungin match hi khelh a ni ta tho a, mahse a hmuna inkhel en tum Malawi president Peter Mutharika chuan a inkhelh em tum hi a ṭhulh thung. Malawi pre­sident chuan chhiatna tawkte a tawrhpui thu sawi­in sorkar chuan an­mahni tuam hlawm nan theihtawp a chhuah chhun­zawm tur thu a sawi.