Lowery vangin Defoe mittui a tla

Bournemouth stri­ker Jermain Defoe chuan Sunderland fan, neuro­­blas­­toma (cancer natna chi khat) avanga thih hlauh­thawnawm dinhmuna ding mek Bradley Lowery chungchang a sawinaah a mittui a dang zo lo.

Sunderland aṭanga Bourne­mouth pan hlim striker hi Black Cats tana a khelhlaiin Bradley nen hian an inhnaih hle a, khelmual chhungah pawh English striker hian kum ruk mi naupang hi a hruai lut fo.

Ningani khan England interna­tional hian press conference a hmachhawn a, dinhmun hlauh­thawnawm taka ding mek Lowery chungchang zawh a nih laiin a mittui a tla a, minute hnih chhung ngawt chu a sawi zawm thei lo.

Kum 34-a upa striker chuan, "Lowery dinhmun hi a ṭha lo takzet a ni. Hun rei tak chhung ka insum tawh avangin vawiinah hian ka mittui pawh dan let harsa ka ti a ni. A chhungte nen nitin kan inbia a, hmanni lawkah khan awm dunin hun kan hmang dun a, na hrehawm tak a tuar lai hmuh hi thil hrehawm tak a ni," a ti.

West Ham, Tottenham leh Ports­mouth tan pawha lo khel tawh striker chuan, "Bradley hi ka damchhung zawngin ka thinlungah a cham reng tawh ang. Bradley ngaihtuah loh emaw a chanchin ngaihvena phone en loa ni vuiliam hi ka nei ngai lo. A hmangaihna min pek kha a tak em em a, ka mitah tak min en hian chu chu ka hre thei a ni," tiin a sawi.

Sunderland fan ruhkawl Bradley hi nikum September-ah khan Defoe nen hian an inhmelhriat ṭan a, Everton nen an inhmachhawn dawn ṭumin Spurs striker hlui hian a kai chhuak. Stadium of Light-a Bradley hruai luh a nih lai hian "Bradley chu pakhat chauh a ni" tihte, "Bradley, i bulah kan awm reng" tih banner-te chu hmuh turin a awm.

Defoe chuan an intawn hmasak ber aṭang hian Bradley nen an innel nghal thu sawiin, "Ka inah hian Bradley nena kan thlalak tam tak hmuh turin a awm a, tuna ka intharah pawh hian ka luahna a la rei lo hle chungin kan pahnih thlalak hmuh tur tam tak a awm a ni," a ti.

Wembley-a England leh Lithuania-in March-a World Cup qualifier an khelh ṭum khan Bradley hian Defoe nen England team hma an lo hruai tawh a, Defoe chuan, "Joe Hart-a'n 'JD Brad nen team hma hruai rawh u' min tih khan England danglam zia ka tem a, Brad kha hnam hla an play lai khan ka lam a rawn hawi a, min kuah vawng vawng a ni. Kan hun hman zawng zawngte kha a special em em a, vannei ka inti takzet a ni," tiin a sawi.