Sebastian Vettel a inchhir

Formula 1 team cham­pionship hmahruaitu Ferrari driver Sebastian Vettel chuan a elpui Lewis Hamilton laka a chet danah a inchhir thu a sawi chhuak.

Intlansiak hnuhnung ber Azerbaijan Grand Prix-ah Vettel hian a hma a tlan Mercedes driver Hamilton a su a, a hnuah British driver tana hlauhawm tur takin car a khalh zui bawk. Intlansiaka thuneitu sang Federation Internationale de l'Automobile chuan Vettel chungchang an ngaihtuah nawn hnuah hremna an pek belh lo.

World champion vawi li ni tawh Vettel chuan, "Khatiang thil kha a thleng nawn tawh lo ang. Ngun takin ka ennawn a, ka ti dik lo hle a ni. A lakah ngaihdam ka dil a, ani pawhin ṭha takin min chhang," tiin a sawi.

Pathianni tlai dar 5:30-ah Austrian Grand Prix tlan a ni leh dawn a, Vettel leh Hamilton te bawk hi mipui ngaihven tur an ni ang. World champion nilai Hamilton hian driver championship-ah Vettel hi point 14 in a phak lo mek.

Hamilton chuan, "Ba­ku-a inelna ka neih zawh khan inbiakna kan nei nghal a, kan inkarah boruak ṭha lo a awm lem lo. Infiamna huangah chuan inel vek kan ni a, kartawpah pawh hian pakhatna nih kan inchuh leh ang," a ti.