Arsenal leh Jesus an puak ring

Gabriel Jesus-a'n Arsenal tana a Premier League goal hmasa ber a khung a, a goal hnihna a khung chhunzawm bakah assist vawi hnih a nei bawk. Mikel Arteta nauten an mikhual Leicester City 4-2 in an hneh, duhthusama ṭhain season bul an ṭan.

Gunners hian an match hmasa zawkah Crystal Palace 2-0 in an hneh tawh bawk, an match thumna atan kar tawpah Bournemounth an hmachhawn leh dawn, an phurna hi an chhunzawm nung reng thei dawn em hriat a châkawm.

Jesus a ṭha tawk
Manchester City aṭangin nipui bazarah Arsenal a zawm. Pep Guardiola-a'n Erling Haaland a lakluh avangin Jesus hian inkhelh tam theihna tur hmun a pan, a beisei ang ngeiin khelhna chu a chang a, striker ṭha a nihna a pho chhuak bawk.

A thawhrim bakah goal khung thei a nihna a lantir a, chep tak karah Foxes keeper Danny Ward dan phak lohin a chip lut keuh. Brazilian striker hian corner aṭanga ball kal chang fuh lehin, chawlhlawk hmain goal hnih a khung fel.

Second half tirah William Saliba-a'n anmahni lamah a ti lut palh a, mikhual Foxes phur ve deuh mah se Granit Xhaka hmangin North London club an kal fal leh. James Maddison goal khung pawh an hlim au thawm a reh hmain Gabriel Martinelli chuan a hmet dai.

Kum 25 mi Jesus a khel ṭha a, midfielder Xhaka leh Martinelli te goal tur a siamsak bakah amah ngei pawhin hun ṭha dang a insiam hnem. A tlan tamin a ball bawh a na, keeper Ward-a'n vannei taka a lo dansak vangin hattrick a siam lo hlauh, hnai takah goal zawnah a pet lo bawk.

Arsenal an phur
Goal hnih leh assist vawi hnih neih hi Jesus tan thil ṭha a ni, inkhel entute erawhin a aia tam leh nasa zawk an beisei ngam ngei ang. Palace laka man of the match Saliba chu tlarhnung laiah a dingnghet a, an lamah ti lut palh mah se an lama lut tur a dansak ve bawk.

Midfield laiah Xhaka leh Thomas Partey te an inkawp nghet viau a, a ṭul chuan Oleksandr Zinchenko hi midfield-ah a hman theih tih a takin an lantir. Defender pahnih Takehiro Tomiyasu leh Kieran Tierney te an dam leh ta khan phurna a siamsak bawk ang.

Match hnih chauh a la nih avangin Arsenal hi an dinhmun teh nan a la tawk lo. A bikin keeper Aaron Ramsdale-a'n zir tur a la ngah, ṭul vak loah Jamie Vardy lakah penalty a chawi teuh hle - VAR hman hnuah an hnawlsak leh hlauh.

English keeper hian a ven theih ngei tura ngaih a veng lo, midfielder Maddison-a'n a kapkarah a pet luhsak thei. Tihsual neih a pawi, a bikin keeper tan tihsual a langsar ṭhin, inkhel pawimawhah ball sem chauh ni loin a ven lamah hmasawn a la mamawh.

Eng nge an sawi?
Arsenal manager Mikel Arteta chaun, "Player lamin an tih tur tak an ti a, fans lamin an hna an tlin hle bawk. Emirates Stadium hi khatianga thawm bengchheng leh turu awmna tur hmun kha a ni reng a ni, kan player ten thlawpna an mamawh laiin an thlawp ṭha.

"Ka nauten khatiang taka an khel ṭha kha mak ka ti hran lo, an thawkrim in an taimak avangin hetiang anga result ṭha hi chu an phu," tiin a sawi a, a naute khelh danah a lungawi hle a, hmasawn erawh an la ngai tih a sawi bawk.

Nipui bazarah Leicester City an che ṭha tawk lo a, player lakluh mumal an nei lo. Manager Brendan Rodgers-a lu ti hai zual turin defender Wesley Fofana chu Chelsea nen an inhnaih - Foxes tana a match hnuhnung ber a khel nia ngaih a ni.

Khelmual a chhuahsan dawnah Fafona hian fans a mangṭha. Mahse, Rodgers chuan, "In mangṭhana thil niin ka hre lo, mahse media lam chuan an duh angin an ziak thei," tiin a sawi a, a player chu a theih chen chen chelh a duh.