Kan nihna tak lantir a ngai - Milner

Liverpool midfielder James Milner chuan Crystal Palace lakah an nihna tak an lantir a ngai tih a sawi. Reds hian zanin dar 12:30 hian Premier League khel turin Anfield-ah Palace an lo mikhual ang.

Jurgen Klopp-a nauten an match hmasa berah beisei an phak lo, kai thar Fulham lakah goal hnih an phurh an sut zo hram a, khualmualah point khat an hlawh chhuak. Patrick Vieira naute lakah point an hloh leh a nih chuan an elpuite lakah an hniam fal dawn.

English mi Milner chuan, "Kan ṭhat lohna leh chet fuh tawk lohna lai hrang hrangte pawh kan sawi khawm. Coach hoin kan sawi a, player ho pawhin kan sawi bawk. Fans beisei anga kan khel chhuak lo kha a pawi kan ti hle.

"Eng anga khel turin nge min beisei tih chu kan hria, min beisei tute duh ang ngeiin kan khel chhuah a ngai," tiin a sawi. Reds hian hliam vangin Thiago Alcantara an chhawr thei dawn lo, Curtis Jones leh Alex Oxlade-Chamberlain te an chawl mek bawk.

Naby Keita erawh a dam tawh a, minute 90 khel turin a rin tlak em tih erawh a chiang lo. Midfielder khel thei lo an tam chuan kum 36 mi Milner hi mamawhna laia chhawr theih a ni a, a tawnhriat hi a ṭangkai ṭhin.