Champion zia chhuahtu City

Premier League champion lai Manchester City chu nomawi humhum thei tura ngaih an ni. Pep Guardiola naute hian an mikhual Bournemouth chu 4-0 in an sawp a, match hnih an khelh tawhah goal ruk khungin anmahni lamah a la lut ve lo.

Citizens tan Ilkay Gundogan-a'n goal hmahruai a khung a, a siamsaktu chu Erling Haaland a ni. Kevin De Bruyne a inlar zui a, forward Phil Foden siamsak a khung - Belgian midfielder hian Folden khung tur a assist zui ve bawk - goal lina erawh Jefferson Lerma-a'n anmahni lama a tih luh a ni thung.

Inrinni zan Etihad Stadium-a inkhelah beisei angin Haaland a che na lo, ball a khawih hmasak berin minute 18 zet a liam tawh, mahse he ball hian goal khung tur a siamsak thung. City-in goal li an khung a, Haaland-a'n a pet goal ve lo - inkhelh banah Guardiola chuan a striker thar hi a chhan.

Spanish manager Pep chuan, "Bournemouth khan tlarhnung laiah player pathum an dah, chumite thlawp tur chuan an hmaah mi pahnih an la awm bawk. Goal venhim tum tlak lakah striker tan khelh a harsa, chuvangin Erling khan hna hautak a thawk a ni," tiin a sawi.

Man City hian Gabriel Jesus leh Raheem Sterling te an chhuahtir a, an player hman thiamsa pahnih an chhuah avangin tlarhma lam an inrem thar mek. Hetih lai hian Foden leh Riyad Mahrez te an la neih tho avangin buaina erawh an tawk lo.