Lewy leh Barca ten beisei an pha lo
Barcelona-in La Liga match hmasa berah an player lak thar Robert Lewandowski, Andreas Christensen, Raphinha leh Franck Kessie te ziaklut hman mah se an mual Nou Camp-ah Rayo Vallecano nen goal awm loin an inhnehtawk.
Striker goal khung thei bik Lewy-a'n kum riat chhunga a vawi khat nan season bul ṭanna inkhelah goal a khung lo a, hun pek belhah Sergio Busquets chu hnawhchhuah a ni bawk.
Laporta-a'n a hna a thawk
Barcelona-in La Liga match hmasa bera player lak tharte an chhawr theih nan Zirtawpni khan Barça Studios-a 24.5% chu Orpheus Media hnenah euro maktaduai 100 (£84.6m) in an hralh belh.
Hemi hma hian Catalan club hian Barca Studios-a 25% chu Socios.com hnenah euro maktaduai 100 thoin an hralh tawh a, domestic television rights 25% chu investment firm Sixth Street hnenah kum 25 chhung atan an hralh bawk. Heta ṭanga an sum hmuh belhkhawm hi euro maktaduai 700 vel a ni.
Barca-in risk an lak zarah match khelh niah Lewandowski, Christensen, Raphinha leh Kessie bakah contract thar an ziahpui Ousmane Dembele leh Raphinha te chu La Liga khel turin an ziaklut.
Sevilla aṭanga pound maktaduai 42-a an French lakluh Jules Kounde erawh an la ziaklut thei lo a, Barca kawr haa competitive match khel turin a nghah rih a ṭul.
Barca president Joan Laporta chuan club sum dinhmun chhiat laiin Xavi tan player ṭha a chhawpsak a, a hna a tlin hle. Chutihrualin Catalan club-in 'risk' sang tak an la a, sum ṭhahnem tak senga player ṭha an lakna hian result ṭha a thlen lo a nih chuan club hmalam hun hi a thim khawp ang.
Xavi-a'n a hna a ti lo
Barcelona tan Lewy, Raphinha leh Christensen ten bul an ṭan a, Kessie bakah Manchester United nena sawizawm Frenkie de Jong te chu bench-ah an awm. Catalan club-in Rayo Vallecano lakah inkhel thunun mah se goal khung an harsat.
Bayern Munich aṭanga an lakluh Lewandowski-a'n cool takin goal khung mah se offside vangin pawm a ni lo. Lewy hian second half-ah chance ṭha bik a hlah leh bawk. Catalan hian inkhel thunun 68% ball chang mah se a pawimawh ber goal an khung thei lo.
Barca hi an vanduai ṭum ni se chak lo thei an ni zawk. Vallecano forward Sergio Camello chuan mikhual team tan chakna goal a khung teuh hle. Mualneitu lamin point thum an hlawhchhuah theih loh bakah injury time-ah Sergio Busquets chu yellow card vawi hnihna a hmuh avangin hnawhchhuah a ni.
Beisei a sang mah mah
Barcelona manager Xavi chuan, "Rayo khan goal an venghim ṭha a, goal chance insiam pawh kan harsat a ni. Fan-ten an duh ang kan lantir thei lo kha pawi kan ti hle. Chutihrualin min ṭantute pawh dawhtheihna nei turin kan beisei. Kan ṭhat theih dan berin kan khel lo a, tun aia kan goal bawh a nat a ṭul a ni," tiin a sawi a, beiseina an nei san mah mah thu a sawi bawk.
Bench-a De Jong awm chungchang zawhna chhangin Xavi chuan, "Mi dang thachhang dawltu a ni lo. Player pawimawh a nih thu ka sawi tawh a, kan bula a cham a nih chuan player pawimawh a ni reng ang," tiin a sawi a, nomawi chawi chu an tum ber a nih thu a sawi tel bawk.
August 13, Inrinni
Osasuna 2 - 1 Sevilla
CEL : Iago Aspas 45+2'; Goncalo Paciencia 63'
Celta Vigo 2 - 2 Espanyol
CEL : Iago Aspas 45+2'; Goncalo Paciencia 63'
ESP : Edu Exposito 72'; Joselu 90+8' (P)
Valladolid 0 - 3 Villarreal
VIL : Nicholas Jackson 49'; Alex Baena 81', 90'
Barcelona 0 - 0 Rayo Vallecano
Zanin Inkhel Tur
Getafe 11:00 PM Atletico Madrid
Real Betis 1:00 AM Elche