Neymar leh PSG an kal fawr

Paris St-Germain chu Ligue 1 champion an ni leh dawn, tia sawi ngam a ni nghal der mai. Paris club hian Inrinni zan khan Neymar-a goal hnih hmangin Montpellier chu 5-2 in an sawp - match hnih an khelh tawhah goal 10 an khung tling der.

Paris khawpuia inkhelah Neymar bakah hian Kylian Mbappe leh Renato Sanches ten goal khat ve ve an khung a, mikhual team tan Falaye Sacko chuan anmahni lamah a ti lut palh bawk.

France internaional Mbappe hian hliam vangin match hmasa a khel lo, penalty hmasa hlah mah se a hnuah erawh goal a khung tho a, a inlanna hmasaah goal a nei leh nghal. Penalty hnuhnung zawk erawh Neymar kutah a tla thung.

Brazil international forward Neymar hian tun season Ligue 1 bikah match hnih aṭangin goal thum a khung a, a ṭhiante khung tur vawi thum a siamsak tawh bawk, khawvel player manto ber hian duhthusama ṭhain season bul a ṭan.

PSG manager Christophe Galtier chuan, "Ka tan chuan kan khelmuala league match kan khelh vawi khatna a ni a, khatiang tak maia fans lamin min lo dawngsawng ṭha kha a lawmawm, an duh ang result kan siamsak thei kha an phu hle.

"Ka naute khan goal khung an chak zek zek a, goal nga bakah khan hlauhawm tam tak kan siam chhuak thei. Kan nawr nat em avangin Montpellier khan min vuak let theihna remchang an nei ve bawk, kha lai tak kha hmasawn kan ngaihna lai tur a ni ang," tiin a sawi.