Hnehna nena bul ṭan AC Milan

Serie A champion lai AC Milan chuan Inrinni zan khan season thar an league match hmasa an khel a, an mikhual Udinese chu 4-2 a hnehin a bul an ṭan fuh hle - an hmelma leh elpui Inter Milan pawhin hnehna nen bul an ṭan ve bawk.

Milan leh Inter bakah hian AS Roma leh Juventus te chu Serie A nomawi inchuh tur an ni dawn, nizan khan Roma leh Old Lady an inlan a, he thu buatsaih lai hian an result kan hre hman lo thung.

Thawhlehna
San Siro-a inkhelah Milan lamin goal an chhuah hmasa. Rodrigo Becao chuan minute hnihna lekah goal hmahruai tauh lutin Udinese hma a hruai pui a, chungnung zawk an nih chhung erawh a rei lo.

Minute 11-naah Theo Hernandez-a penalty hmangin an sut a, minute li hnuah Ante Rebic chuan a khung belh; chawlhlawk hmain Adam Masina hmanga an sut ṭhen avangin mikhual lamin point hlawh chhuah an beisei ngam.

Striker ṭha Zlatan Ibrahimovic a la inkhel thei lo a, bench lamah Olivier Giroud a awm a la ngai bawk - hliam dam hlim a ni. Milan goal nawr erawh a na viau tho, second half-ah Brahim Diaz hmanga an khung bakah Rebic chuan a goal hnihna a khung bawk.

Hun tawp dawn lamah Milan hian Giroud an luhtir a, nipui bazara Liverpool aṭanga an lak thar Divock Origi pawhin a league match hmasa a khel ve bawk. Stefano Pioli naute hi an goal nawr a na leh dawn tih a chiang.

Milan manager Pioli chuan, "League nomawi kan chawi hnua kan match khelh leh hmasa a ni a, a boruak chu a danglam duh ve hle. Min chhuahsan tawk awm mah se kan mamawh ang kan lakhawm ve bawk a, team ṭha lehzual zawk kan din ka ring," tiin beisei a nei sang hle.

Lukaku awmna Inter
Goal khung a harsat avangin Chelsea a chhuahsan a, a club hlui Inter Milan-ah Romelu Lukaku a kir. Belgium international striker hian goal khung turin hun a mamawh rei ta lo, ṭan aṭanga minute hnihna lekah Inter tan goal a khung leh nghal.

Leece lamin Assan Ceesay hmangin an sut a, goal dang a lut mai tawh lo, team pahnihin point khat ve ve an hmu dawn niin a lang hman. Mahse, hun tawp hma chiahin Denzel Dumfries chuan corner aṭanga ball kal zel chu 2-1 a an chak nan a khung.

Chakna goal khungtu Dumfries chuan, "A pawimawh ber chu point thum hmuh kha a ni. Season hmasa kha chuan tun ang inkhelah khan point kan hloh fo, tunah erawh chak duha kan tuihal miau avangin result ṭha kan hmu," tiin a sawi.

Inter hian tun hnaia season li chhung chu an match hmasa berah hnehna an chang vek, kum 1993 aṭanga 1997 inkar khan a zawnin vawi nga an lo chak tawh - an record ṭha ber an hnaih tawh hle, a pawimawh zawk erawh an chak chhunzawm zel em tih a ni ang.

Nerazzurri coach Simone Inzaghi chuan, "Club dangte angin bazarah kan thawm a na tawk lo a ni mai thei, khelmual chhungah erawh kan thawm a ring hle ang. Player 11-in bul an ṭan a, bench aṭanga lut tur pawh ṭha tak tak kan la nei," tiin a squad neih laiah a lungawi.

Italy - Serie A
AC Milan 4 - 2 Udinese
Sampdoria 0 - 2 Atalanta
Lecce 1 - 2 Inter Milan
Monza 1 - 2 Torino