Premier League Club Bihchianna Man City - Joe Hart leh Vincent Kompany

Premier League ṭantirhin Manchester City hi club vantlang an ni a, ṭum hnih relegate tawhin League One thlenga tlak thlak pawh an nei. Amaherawhchu, kum 2002 aṭangin Premier League an khel chho char char a, nomawi pawh vawi li an chawi ta.

Arab sum mawm an chawm hnuah an vanglai hun an hmang a, Premier League khel tawh zingah sulhnu nei ṭha ber pawl ni tawhin tuna an player-te hi club tana sulhnu nei ṭhate an ni pha. Tun hma leh hret thlir kir chuan season li chhung City player of the year-a thlan Richard Dunne hming lam rik ngei a ṭul a, chutihrualin Irish defender hun lai hi chuan Man City hi club vangtlang an ni.

City vul chhoh hnuah erawh David Silva leh Sergio Aguero te an thawh hlawk a, tun ṭumah erawh Joe Hart leh Vincent Kompany te kan belchiang thung ang.

Manchester City manager Pep Guardiola-a'n English club a zawm tirhin duh dan a nei sa a, goalkeeper aṭanga ball semchhuah a duh. City neih sa Joe Hart chu club legend ni mah se a chhawr duh loh tur thu a tichiang nghal a, England international career pawh a nghawng nasa hle.

Pep-a'n duh lo mah se Hart hi Man City tan chuan player pawimawih bik a ni a, Premier League leh League Cup-ah vawi hnih ve ve a champion pui bakah FA Cup-ah nomawi a chawipui bawk. Hart hian Shrewsbury Town aṭangin Man City hi kum 2006 khan a zawm a, a man zat hi  £100,000 chauh niin khatih laia club chairman John Wardle chuan a sawi.

Hart hi a man zat aṭanga teh chi a ni lo, English keeper hi 2007 aṭangin first choice a ni chho a. Kum 2010 aṭang phei chuan league match tinah a inlan deuh ziah a, England tan pawh rinrawl ni chhoin match 75 zet a khel. Man City chuan club tana Hart-a hnathawh hi an hre reng a, kum 2018 khan goalkeeper training pitch chu keeper Joe Hart hming chawiin an phuah a ni.

Manchester City hlawhtlinna sawi dawn chuan Vincent Kompany-a hming lam hmaih a thiang lo. Tun season-ah City an che ṭha tawk lo a, Pep Guardiola hote buaina tlarhnung a nih miau avangin Spanish manager-in captain Kompany  chelh tura a ṭang na hret lo chu a inchhir hial a rinawm.

Kompany hi April 10, 1986 khan Uccle, Brussels-ah a piang. A nu Joseline Fraselle chu Belgian a ni a, a pa Pierre Kompany erawh Congolese a ni thung. Naupan tet aṭangin football a tuichilh a, a zinkawng erawh mi ropui dangte ang thoin a bum boh hle. Vun rawng vangin hmuhsitna nasa tak a tawk a, a nu leh pa inṭhen hnuah a tawk nasa lehzual.

Kompany chuan, "Kum 14 mi ka nihin ka nu leh pa an inṭhen a, naupang dang zingah hetiang dinhmun tawng an awm ve tho avangin mal ngawih ngawihah ka inngai bik lo. Ka khawharna hnem turin football ka thlang a, nitin nun erawh a hautak ve hle. Ka pain hna a chan a, school aṭangin hnawhchhuah ka ni a, Belgium youth team aṭangin paih ka ni. Zirtirtute leh coach-te nen kan inhmu thiam lo a, khaw laiah hun hmang tamin ṭhian sual ka kawm bawk," tiin a tun hma chanchin a sawi.

School aṭanga hnawhchhuah a tawh chhan hi a vun rawng vanga hmusittu a sawisak vang a ni a, amaherawhchu a harsatna hi a hlawhtlinna daltu atan a hmang lo. Chutihrualin Kompany hian hmangaihtu a nei a, a pa Pierre nen hian an inkawmngeih a, a agent a ni tel bawk.

A nu Joseline Fraselle-i pawh an inṭhen hnu thlengin a chenna Hainaut aṭangin Brussels-ah a fapa training lai thlir turin kar tinin a kal ṭhin. Kompany thlen san hnuah erawh Joseline hian mipui pumpelh turin TV aṭanga en a thlang a, kum 2008 khan cancer vangin a thi.

Kum 2004 khan Kompany chu Belgium tan kum 17 mi lek niin a khel ṭan a, kum hnih hnuah Anderlecht player hralh tawh zinga manto ber (€10m) ni turin Hamburg a pan. German club-ah Kompany a che ṭha tawk lo a, pound maktaduai riat-in kum 2008 khan Manchester City a zawm. Hemi kum vek hian West Ham nen an inkhelh ṭumin Kompany hi City tan a inlan ṭan a, Wigan Athletic nen an inkhelh ṭumin a goal hmasa ber a khung.

Kum 2011-ah Kompany hi City player of the year atan thlan a ni a, hemi kum hian a captain-na hnuaiah FA Cup-ah an champion. Belgian defender hian kum 2012-ah Manchester United lamah goal pawimawh khungin 1-0 in an chak a, Man City-in a vawi khat nan Premier League nomawi an chawi.

Kompany hian Man City hi Premier League (3), FA Cup (2) leh League Cup (4)-ah te a champion pui vek a, a luhtirha English club vantlang ni ṭhin kha a chhuah meuh chuan khawvel club ṭha ber zingah sawi an ni tawh. Belgian mi ni mah se Manchester mipui chuan Kompany hi Manchester khuaa seiliante ang thoin 'Mancunian dik tak' ah an ngai a, hei hian Citizen-a a dinhmun chu a tichiang hle.

2018–19 season khan Manchester City tan league nomawi humhim turin point hloh a thiang lo a, Leicester City lakah goal an khung theih loh avangin an mangang. Minute 70-naah Kompany chuan yard 25 aṭangin Foxes lamah mar ṭha zetin a pet lut a, Leicester keeper Kasper Schmeichel tan dan rual a ni lo.

Man City ngeih lo bertu tiha an sawi ṭhin Man United legend Gary Neville pawhin, "Khawlaiah nge i lim dah i duh?" tiin goal a khung chiah hian Sky commentary box aṭangin a sawi a, Kompany a dah sanzia a lang.

Kompany-a'n Man City a chhuahsan dawn khan club ṭantu ruhkawl Oasis co-lead vocalist Noel Gallagher chuan Seoul, South Korea-ah an hla mawi tak 'wonderwall' hmangin Vincent Kompany a thlah a, Man City captain a thlah lai hian big screen-ah Belgian defender thlalak pholan a ni.

Seoul-a an zai ṭumah hian hla thua 'Tumahin ka ngaihtuah ang che hian an ngaihtuah ve che ka ring lo' tih lai chuan Vinny a kawk a, Man City ṭantu tan a hlu takzet. City pawhin twitter-ah 'I rin phak bak aia nasain kan hmangaih che,' tiin an captain hi an thlah ve bawk.

Manchester City manager Pep Guardiola chuan, "Kan vaiin kan ui dawn. Mimal tak pawhin ka ui a, chutihrualin engtik hunah emaw chuan a rawn let leh dawn. Season ṭha tak hman zawha in thlah aia ropui a awm lo. Amah hi captain dik tak a ni a, kan hmangaih a ni tih kan lantir zel ang," tiin Kompany tan an inhawn reng thu a sawi. Kompany hi City aṭangin a bul ṭanna Anderlecht-ah manager leh player hna kawp turin a let a, beisei angin a che ṭha lo.