Independence Day Football Tournament 2022 Dream Final : Mizoram Police Vs Aizawl FC
Mizoram Football Asso-ciation buatsaih I Day Football Final-ah vawiin tlai dar 3:00 hian Mizoram Police leh Aizawl FC te Lammualah an inkhel dawn.
India zalenna ni champha pualin Mizoram hmun hrang hrangah football inelna buatsaih a ni a, vawiin hian district tinah tualchhung football inkhel hmuhnawm thlir tur a awm ang.
Mizoram football inpui Lammuala khelh tur hi a lian ber a ni a, MPL club pariat zinga a ṭha pahnih Police leh I League club-te an inhmachhawn dawn avangin 'Dream Final' tiha sawi theih a ni.
Hmuhnawm thuah hnih
Club football hi chu veng/khua inelna nen khaikhin a rem lo a, ṭhutna ṭha duhin Inter Village Football 2022 final anga hma taka kal kher a ṭul lo ang.
Chutihrualin Police leh Aizawl FC final hma hian Veteran football final thlir tur a awm dawn a, chhun dar 12:30-ah Mizoram Police leh G90's te an inkhel dawn.
Veteran football-ah pawh hian team ṭha pahnihin nomawi an inchuh dawn - Police-ah hranghlui player ṭha an ṭhahnem a, G90's hi kum 1990 chhoa footballer langsar rual intel khawm - S Malsawmtluanga-te an ni.
Tualchhung football tuichilh tan chuan kal hma a sual lo mai ni loin kal hma ngei a ṭul.
Hei mai hi a ni lo, dar 10:30 aṭangin hmeichhe final khelh tur a awm dawn - football final pathum khelh a ni dawn.
Team ṭha bik chu
Mizoram Police hi tualchhung football-ah chuan tun hma aṭangin 'tehfung' atan hman ṭhin a ni a, tun thleng pawhin tehfung atana hman theih an la ni.
Police player tam zawk hi kum lamah upa mah se player langsar awm khawm an ni a, MPL club-a training ṭan hmasa ber an nih avangin inelna ṭan hma hauh aṭangin champion rinkai an ni.
Hri leng vangin kum 2019 MPL Final hnu lamah inelna a awm thei lo a, MFA-in kuminah inelna buatsaih an tum tih an puan rualin MPL club an inhmukhawm. An thutlukna chu player hlawh bituk bakah foreigner lak loh a ni.
Hemi a nih avang hian team tin an intluk tawk dawn tih a hriat theih a, chutihrualin Aizawl FC erawh I League an khelh miau avangin player ṭha an hip bik a, MPL club dang aiin player thar an nei ṭha zawk.
Pahnihna vs Pahnihna
Police hi Aizawl FC hi team ṭha pahnih ni mah se group stage-ah beisei an pha lo a, pahnihna niin semifinal an lut.
Lalbiaksanga Colney kaihruai Police-in Chhinga Veng 2-0 a hnehin bul an ṭan mah se Electric Veng 2-1 in an hneh lo a, group match hnuhnung berah Chanmari laka si an phurh hnuah 4-4 a draw pui hramin semifinal an lut hram a ni.
Lalrozama Fanai kaihhruai Aizawl FC pawhin FC Bethlehem (4-2) leh Chawnpui FC (2-1) an hneh hnuah FC Venghnuai lakah 3-1 in an tlawm.
Group stage-ah Police leh Aizawl FC ten beisei an pha lo a, semifinal-ah an theihna kan hmu chho ṭan.
Police-in penalty hmangin Venghnuai hneh mah se inkhel an thunun a, team ṭha an ni tih an pholang.
Aizawl FC pawhin hun tawp dawna Jeremy Laldinpuia goal hmangin Chhinga Veng hneh ṭawk mah se chak phu zawk an ni a, a vawi khat nan an cleansheet bawk.
Tawnhriat nei ṭha vs Theihna nei sang
Police player-ten tawnhriat an nei ṭha a, hun pawimawhah an danglamna a lang tlat zel. Semifinal-ah bench aṭanga lut captain Lalfakzuala inhliam thlak nan MPL-a goal khung tam ber record neitu F. Lalrinpuia an la luttir thei a, hei hian an squad chhahzia a pholang.
Final-ah goal thum khung tawh Malsawmfela'n en a hlawh dawn a, semifinal-a goal khungtu Lalnunsanga (Talea) a pawimawh nawn a rinawm a, MPL history-a midfielder ṭha pawl R. Malsawmtluanga pawh midfield-ah a pawimawh leh dawn.
Tun inelnaa Aizawl FC khelh ṭhat ber chu semifinal kha a ni a, final-ah player an thlak danglam tam kher lo ang. Tlarhnungah Lalmuanawma'n (Munez) captain armband chelhin Rohmingthanga nen an inkawp a, midfield-ah Hnahthial district tlangval pahnih KC Larchhuakmawia leh K. Lalrinfela-te an awm avangin Inter Village best player Champhai star Lalramsanga tan pawh hmun a awm kher lo ang?
Tlarhmaa goal hnih khung tawhtu MS Dawngliana a tel ngei a ṭul a, Dawngtea kawppui tur erawh rin thiam a har thung.
Team Dinhmun
Aizawl FC an dam kim a, Mizoram Police-in hliam vangin captain Lalfakzuala an chhawr thei lo ang.
Semifinal-a team pahnih inlan dan
Aizawl FC: Vanlalhriatpuia (GK), Lalmuanawma, Jessey Vanlalmuana (Jeremy Laldinpuia 59'), Lalbiakzuala, KC Larchhuakmawia (Lalramsanga 59'), R. Lalthanmawia, K. Lalrinfela, HK Lalhruaitluanga (K. Lalhmangaihkima 59'), R. Ramdinthara, Rohmingthanga, MS Dawngliana (Jakob Vanlalhlimpuia 46')
Inlan lo: Lalmuansanga (GK), K. Lalrosanga, Imanuel Lalthazuala, David Lalhlansanga, Melory Laldinsanga
Mizoram Police FC: F. Lalmuanawma (GK), Lalrinzuala Khiangte, Lalhmunmawia, H. Lalbiakthanga, Lalbiakhlua, Malsawmfela, Laldawngliana Colney, Lalnunsanga, Lalruatpuia, R. Malsawmtluanga, R. Lalthantluanga
Inlan lo: Laltanpuia (GK), Zaithan-mawia, B. Zoramthanga, H. Lalchhanchhuaha
District hrang hrang thlirna tawi
Aizawl
Mizoram Football Association-in MPL club, veteran (40+) leh hmeichhe pualin I Day Football a buatsaih. Aizawl DFA erawhin inelna an buatsaih lo.
Venue : Lammual
Hmeichhia
Govt Central HSS, College Veng
10:30 AM
New Vision School, Electric Veng
Veteran
Mizoram Police 12:30 PMG90's
Mipa
Mizoram Police FC 3:00 PM Aizawl FC
Lunglei
Lunglei DFA buatsaih inelnaah hian first division club pariat an inel a, final hma zawng hi Lena Stadium, Serkawnah an khel. I Day Football inelna neih hma hian first division sreening neih a ni a, chuta ti ṭha pariat chuan tun ṭum inelna hi an hmachhawn.
Venue : C. Ṭhuamluaia Mual
SYS FC 2:00 PM Electric Veng FC
Siaha
Siaha DFA buatsaih inelnaah team 28 an tel a, club inelna niin DFA hnuaia affiliated club tan a tel theih a, knockout hmanga inelna neih a ni.
Venue : DFA Playground
Siaha United FC
1:00 PM
Chhochho Paw FC
Champhai
Champhai DFA buatsaih inelnaah hian first division team paruk an tel.
Venue : Chhangphut Field
Bethel FC 2:30 PM Vengthlang FC
Kolasib
Kolasib DFA buatsaih inelnaah hian team 51 an tel a, club inelna niin a duh apiang tan a tel theih. Last 16 aṭangin first division team pariat an inlan ṭan a ni.
Venue : Kolasib Sports Stadium
Tumpui FC 2:30 PM Project Veng FC
Serchhip
Serchhip DFA buatsaih inelna hi First Division leh Second Division-ah ṭhenhran a ni a, Second Division-ah team 19 telin final-ah Chhiatlang Kawn Vengin Keiṭum FC team 1 chu 0-0 a an inhnehtawk hnuin penalty shootout hmangin an hneh. First division-ah hian team pariat an tel a, vawiin hian final an khel ang.
Venue : Serchhip Sports Complex
Vengchung 2:00 PM Hmar Veng
Mamit
Mamit DFA buatsaih inelnaah hian DFA hnuaia affiliated club team 29 an tel a, knockout hmangin an khel.
Venue : GSA Khelmual, Mamit
Luangpawl FC
1:00 PM
Field Veng FC
Lawngtlai
Lawngtlai DFA buatsaih inelnaah hian DFA hnuaia affiliated club te an inel.
Venue : CYLA Playground
Lawngtlai Vengpui
1:00 PM
New Vengpui
Hnahthial
Hnahthial DFA buatsaih inelna hi I Day Fooball pual a nih bakah first division screening a ni bawk. Team 18 an tel a, first division khel turin team pariat an tling a, vawiin hian final an khel ang.
Venue : HDFA Turf Ground
Chanmari FC 12:30 PM Bazar FC
Saitual
Saitual DFA buatsaih inelnaah hian first divison club pakua an inel.
Venue : Centerary Sports Stadium
Keifang FC 2:00 PM Melveng FC
Khawzawl
I Day Celebration Committee leh Khawzawl DFA buatsaih inelnaah hian team 20 an tel a, first division screening ni nghalin a ti ṭha paruk hi first division an khel dawn. Semifinal lut chin hi first division khel turin an tling nghal a, quarterfinal-a tlaten hmunruak pahnih hi playoff hmangin an zawng ang.
Venue : Mualvawm Field
Electric Veng FC
1:00 PM
Vengthar FC White