Mualpho tawpin Man United an mualpho

Manchester United-in tun season Premier League match hmasa berah Brighton & Hove Albion chu an mual Old Trafford-ah 2-1 in a hneh lo a, Inrinni zan khan Community Stadium-ah Brentford lakah 4-0 in an mualpho. A vawi khat nan Premier League-ah Man United hi khualmualah a zawnin vawi sarih an tlawm.

Manager thar Erik Ten Hag nena beiseina sang tak nena season bul ṭantu Man United chu mualpho tawpa mualphoin season bul an ṭan a, match hnih lekah goal ruk chhuahin table mawngphahah an awm.

A goal mawlh mawlh
Christian Eriksen-a'n dinhmun ṭha zawk beiseiin Brentford chelh tumna hnawlin Man United a thlang a, thutlukna dik leh dik loh sawi theih ni lo mah se Danish midfielder hian Community Stadium-a a hun tawn erawh theihnghilh hmak a duh ang.

Minute 10-na lekah Bees midfielder Josh Dasilva ball pet chu keeper David de Gea-a'n a bawh ṭhelh a, mualpho bul ṭanna a ni. Man United an che sual nawn a, box chhunga De Gea pass fuh tawk loh vangin Eriksen a chesual a, Mathias Jensen-a'n minute 18-naah goal hnihna a khung.

Darkar chanvenaah chiah Bees defender Ben Mee-a'n a tauh goal a, United player thar Lisandro Martinez tawi vangah a ngaih theih. Man United an insiamrem thei lo a, minute 35-naah counter attack-ah Bees-in Bryan Mbeumo hmangin goal lina an khung.

Man United legend Gary Neville a lungawi lo, halftime laiin team pahnih inkhel chu, 'Putling leh kum kaw hnuai lam inkhel,' tiin a sawi hial. Hetiang em em chu ni chiah lo mah se hei hian United mualphona a sawifiah.

An sawisel e
Ten Hag hian bul ṭantu zingah Cristiano Ronaldo a telh a, second half ṭan chiahah Tyrell Malacia, Scott Mc Tominay leh Raphael Varane te dahlutin Luke Shaw, Fred leh Martinez te a chhuahtir. United hian goal chhuah belh loin insiamṭha hret mah se first half-a an mualphona an hliah khuh zo lo.

Blackburn champion ṭuma forward Chris Sutton chuan, "A chhiat theih dan ber a ni," tiin a sawi a, Sky Sports pundit Karen Carney pawhin tun ai chet chhiat dan a awm loh thu a sawi.

Premier League legend Alan Shearer chuan, "An buai hle. Club inrelbawlna fel lo avangin kum tam tak an hlawhchham. Hruaitu an nei lo a, player an lakluh dan a fuh lo rapthlak bawk. Siam ṭha tur chuan sum ṭha hnem tak leh hun a mamawh dawn a, Man United ṭantute tan dawhtheihna neih a ngai. An tum ram an hlat hle a ni," tiin Man United dinhmun a sawifiah.

An inpawm
Man United pawhin an khel ṭha lo tih an pawm thlap. David de Gea chuan a tihsual tih a pawm a, manager Erik ten Hag pawhin team anga mawhphurna an lak a ṭul thu a sawi bawk.

Dutch manager Ten Hag chuan, "Tun aia ṭhaa bul ṭan kan inbeisei a, kan beisei letling thawk a ni. Mawhphurhna la tur chu team hi kan ni a, fan-te tawrhna hi pawi kan ti takzet. Theihtawp chhuahin min ṭawiawm mah se an beisei kan pha lo," tiin a sawi.

Inthuam ṭhat an mamawh thu sawiin Ten Hag chuan, "Player thar, theihna nei sang kan mamawh. Hemi kawngah hian theihtawp kan chhuah mek a, kan bula an rawn khelh theih nan kan hmin a ṭul," tiin a sawi.

Man United hian Marko Arnautovic lak an tum a, United ṭantuten an pawmpui loh hnuah an dawr chhunzawm lo. Tunah hian Juventus midfielder Adrian Rabiot lakluh tumin an dawr mek a, fan lamin pawmpui chiah lo mah se an lalut hnai.

Hetih lai hian nipui transfer ṭantirh aṭanga lakluh tuma an beih tawh Barcelona midfielder Frenkie de Jong chuan Chelsea pan a duh zawk niin sawi a awm bawk.