La Liga-in training neih an tum

Coronavirus hri leng vanga football league chawl ṭhuapte pawhin ngai awh an hnaih leh ṭan ta niin a lang a, Belgian league, Dutch league leh Ligue 1 ten inelna an tihtawp laiin La Liga chuan training nei ṭan turin hma an la ṭan mek. 

Bundesliga leh Serie A ten training an nei ṭan leh tawh a, Premier League club zingah Arsenal, Tottenham Hotspur, Brighton & Hove Albion leh West Ham ten training an nei leh tawh bawk. 

Spain prime minister Pedro Sanchez chuan, "May 4 aṭanga chuan professional league-te pawhin training bul ṭanna an nei leh thei tawh ang," tiin a puang a, infiammite chuan mimala training an neih theih tawh tur thu a sawi. 

Tuna La Liga ruahmanna ang chuan June thla laihawlah league hi khelh chhunzawm leh theih beisei a ni a, mahse entu awm loa khelh zawh erawh a ngai dawn thung. 

Spain hi coronavirus hrilengin a tih buai ber pawl an ni a, he hri leng vang hian 24,000 dawnin an nunna an chan tawh - mahse tun hnaiah ziaawm lam an pan chho a, Spain sokar chuan Covid-19 hi do hneh mai theih an inbeisei ṭan a ni. 

Health ministry lamin an puan dan chuan Thawhlehni khan coronavirus vanga thi zat mi 301 an ni a, hei hi tam tak angin lang mah se April-a a tawn san vanglaia ni khata mi 950 an thih nena khaikhin a ralah chuan a ziaawm hle. 

Thawhlehni khan hri kai thar zat pawh 1,308 'chauh' a ni tawh a, March 14-a Spain-in an ram mipuite tana ralkhel dar a vuak hnua ni khata kai an tlem ber ṭum a ni - heng zawng zawng ngaihtuah hian sorkar chuan lockdown thlahdul deuh pawh zuamawmah a ngai. 

Spain sports minister Irene Lozano chuan, "Infiamna pawh a lo kir leh dawn ta a, fimkhur taka engkim kalpui tur erawh a ni ang. Hun harsaa in inpekna, dawhtheihna leh chakna avang khan infiammite chungah kan lawm a, entawn tur in hnutchhiah a ni," a ti. 

Spain sorkar hian an lockdown kalpui khauh tak ti ziaawm tur hian phase li an duang a, 'phase zero' chu May 4-11 inkara hman tur niin professional league-te chu training chhunzawm thei tura tih an ni. 

Mahse, training hi awlsam taka a huhoa neih nghal ngawt tur a ni dawn lo - mimal angin a hrang ṭheuhin training an nei ang a, chumi zawhah group-ah an inṭhen leh ang a, a hnuah a huhoin training chu neih ho leh chauh tur a ni ang. 

Player-ten mimal training an neih hma hian test an nei vek dawn a, nitin test an neih chhunzawm ang - fimkhur thei ang berin engkim kalpui a ni dawn a, ruahmanna hi an zawm thei a nih chuan league khelh zawh theih ngei beisei a ni. 

March 12 aṭang khan Covid-19 avangin La Liga hi kar hnih chhung atan tihtawp lailawk a ni a, hri lengin ziaawm lam a pan theih loh avangin March 23 khan tiam chin awm loin tihtawp a ni.

La Liga tihtawp a nih lai hian Barcelona hi table chung berah awmin match 27 khelh tawhah point 58 an nei a, an hnuai chiaha awm Real Madrid nen khelh zat inangah point hnihin an sang zawk. 

Spanish top flight football-ah hian league match 11 ngawt khelh tur a la awm avangin champion mai ni loin Champions League khel tur 'top four' thlengin chiang sa a la awm lo. 

Table mawng lama awm Mallorca, Leganes leh Espanyol-te pawhin league-a inhamtang turin beisei an la nei vek a, league hi khelh chhunzawm theih a nih chuan a ngaihnawm vanglai tak kan tawng chho dawn tihna a ni. 

Tarlan tawh angin Belgian league, Dutch league leh Ligue 1 te chu khelh chhunzawm theih loha tihtawp a ṭul a, Ligue 1 tihtawp a nih thu puan a nih hian La Liga president Javier Tebas chuan league tihtawp a thlawp loh thu a lo 

sawi tawh. 

Tebas chuan, "Fimkhur thei ang ber leh entu awm lo chunga league hi khelh chhunzawm tur a ni a, thil dang an phalrai ṭhenkhat aia a hlauhawmna tur hi kei chuan ka hrethiam ve lo a ni," a ti. 

Europe-a football thuneitu sang ber UEFA chuan an hnuaia ram te chu an league khelh zawh hram dan tur ngaihtuah turin a lo ngen tawh a, hetihrual hian an khel zo thei lo a nih pawhin season thara UEFA hnuaia inelna hmachhawn tur ruahmanna fel taka siam turin a ti - national association rawtna hi a pawm dawn tihna erawh a ni lo. 

UEFA hian European league-te chu May 25 hmaa league an khelh chhunzawm theih dawn leh dawn loh tichiang turin a ti a, May 27-ah executive meeting an nei zui ang - hetah hian Champions League leh Europa League khelh chhunzawm dan tur chu thu rel langsar tur a ni.