June 8-ah Swiss league khelh chhunzawm dawn

Swiss thuneitute chuan an ram football inelna Swiss league chu June 8 aṭanga khelh chhunzawm an remti a, hetihrual hian fimkhur tak chungin entu awm loa league hi khelh chhunzawm tur a ni. 

May 11 aṭangin player-te chuan training an neih chhunzawm ang a, mahse sorkarin social distancing dan a duante erawh an zawm a ṭul thung ang. Swiss Super League-ah chuan match 13 khelh tur a la awm. 

Swiss football-a top league pahnih chu March thlatir khan Covid-19 hri leng vangin tihtawp a ni a, sorkar chuan August thla tawp thleng mipui 1,000 aia tam punkhawm a khap. 

March thla tawp lam khan Swiss Super League club FC Sion-in an player pakua contract a tihtawp avangin Swiss league hi sawi hat an lo ni tawh - Sion hian Covid-19 hri len laia hlawh tihhniam tuma player an dawrna contract ziak duh lo zawng an ban!

Player contract tihtawpte hi Arsenal player hlui Alex Song leh Johan Djourou, Fulham midfielder hlui Pajtim Kasami, captain Xavier Kouassi, Newcastle tana khel tawh Seydou Doumbia, Ermir Lenjani, Mickael Facchinetti, Christian Zock leh Birama Ndoye te an ni. 

Arsenal defender hlui Johan Djourou chuan April thlatir khan Sion hi court-a a khin tur thu a sawi a, hnehna a chang a nih chuan a sum hmuhte chu midang ṭanpui nan a pek tur thu a sawi bawk - Swiss players’ union (SAFP) chuan Sion hi na takin an lo dem tawh.