Rooney a kir , Lukaku-a'n United a pan

Romelu Lukaku chung­chang­ah Manchester United leh Everton an inrem tawha a lan hnuah Chelsea an rawn lang leh a, Blues hian an elpui ngamna zat pound maktaduai 75 chiahin Toffees an dawr. Premier League champion hian Diego Costa thlakna an zawnna lamah tha pui thawhin ṭang mah se Red Devils hmaah an mawng an hlim mai a ni. Belgian striker Lukaku-a'n Old Trafford a pan dawn a, United legend Wayne Rooney erawh a chawrchhuahna Goodison Park-ah a kir thung.

Manchester United chuan July 8, Inrinni khan thuchhuah siamin Everton nen Lukaku manah an inrem thu an tarlang a, medical leh mimal inremna tihfel a la ṭul tur thu an ziak lang a, Belgian striker man zat erawh an tarlang lo.

Lukaku an hmin
Jose Mourinho hnuaiah Uni­ted-in an la champion ngai lohna Europa League-ah nomawi chawiin season tharah Champions League an khel dawn a, Portuguese manager hnuaiah Red Devils buk a rit leh tawh tih transfer-ah a lang nghal.

United hian season hman zawh takah point 24 zetin Chelsea an phak lo a, Blues hian Diego Costa thlakna turin Lukaku an duhthu tihchiang mah se Belgian striker hian amah hnawl tawhtu Jose Mourinho hnuaiah khelh a thlang.

Red Devils leh Chelsea-in pound maktaduai 75 ve vein Lukaku an ngam a, club pahnih danglamna chu Mourinho hote hian Belgian striker agent Mino Raiola hnenah pawisa pek tam an inhuam zawk. Nikuma United-in khawvela player manto ber ni tura Paul Pogba an lakluh khan Zlatan Ibrahimovic chuan French midfielder hi nipui chawlh laiin Los Angeles-ah chaw a ei pui a, hei hian nghawng a nei tura ngaih a ni.

Heng player ṭha pathum hi agent Raiola hnuaia awm vek an ni a, tun ṭumah hian Pogba leh Lukaku te hian Los Angeles-ah tho nipui chawlh an hmang dun a, French midfielder hian hna pawimawh tak a thawk tura rin a ni bawk.

Maktaduai 100?
United leh Everton inremna hi pound maktaduai 75 a ni a, a man zat hi pound maktaduai 15-a la pung chho tur a ni. Inremna tam takah chuan a pun chhoh theih dan hi awlsam taka neih theih a ni lo a, tun ṭuma mi erawh khawtlang media-te chuan a harsa dawn lo tiin an ziak. English club hian Lukaku hi a khelh tam dan leh hlawhtlin dan a zirin Everton hi pawisa an pek belh ang.

Hei bakah hian United cap­tain Rooney chu Everton lamah a let tawh a, Toffees hian a nihna takah chuan an player hlui hi an chawm zo lo. Amaherawhchu, Red Devils hian Lukaku an lak theih nan tiin Rooney hlawh engemaw zat an tum sak dawn a, hei hi pound maktaduai 10 ni tura ngaih a ni.

Manchester United chuan league nomawi chawi leh ngei an tum tihlantirin season liam taa Premier League-a goal 25 khungtu Lukaku man zatah hian pound maktaduai 100 seng turin an inpeihah a ngaih theih.

Champion duh Lukaku
Belgian striker Lukaku chuan Manchester United a zawm thei chu a tan hun ṭhaah a ngaih thu a sawi. Kum 24 mi Lukaku chuan, "United hi league nomawi duhin an tui hal leh tawh a, khawvel awp leh an duh tawh a ni," tiin Mourinho hnuaiah United an harh thar thu a sawi.

Chelsea striker hlui Lukaku chuan, "Kan naupan lai aṭang­in tun ang hun hi ka lo beisei tawh ṭhin a. Min rawn biak chiah kha chuan vawi hnih ngaihtuah nawn a ngai lo, history siamtu zinga telve hi ka duh a ni. Tuin nge khawvel club lian ber club sawmna hnawl ang. England-a stadium ṭha ber an nei a, fan ṭha ber an nei a, tun hi ka tan hun ṭha a ni," tiin a club thar a fak hle.

Champion ngei a duh thu sawiin Belgian striker chuan, "Kei chuan club an telna apianga champion tum tana khelh hi ka duh a, Manchester United hi chutiang club chu a ni. Tunah chuan tun hma zawng aia rim zawk a thawh a ṭul a, chumi tur chuan ka inpeih a ni," a ti.

Buaina nei Lukaku
Los Angeles-ah Lukaku ten hun an hmang nuam mah mah a, July 2 khan an party buatsaihnaah thawm an neih rin deuh avangin hek an ni a, hei vang hian zilh a ni.

Beverly Hills police chuan Belgian striker hi a hmunah an chhuah nghal tih thuchhuah an siam a, amaehrawhchu October 2 khian court-ah a inlan a ṭul ang. He buainaah hian Lukaku nena US lama inkawp Paul Pogba a tel ve em tih erawh hriat a ni lo.

Once a blue, always a blue
Wayne Rooney-a'n a kum 17 pian cham pha tlin nan ni nga a la mamawh tihin Arsenal lamah goal ropui a khung a, match 30 hneh lo nei loa kaltluang tawh Gunners record a titawp. October 19, 2002-a thil thleng vang hian Rooney hi Premier League-a goal khung naupang ber a ni a, he record duhawm hi James Milner leh James Vaughan ten rawn khum leh tawh mah se English striker hming hi a dai tawh lo ang.

Everton fachuam Rooney hian a kawr hnuaiah 'Once a blue, always a blue' tih hial ziakin Toffees ṭantu thinlung a hmin a, amaherawhchu English striker hian Sir Alex Ferguson-a sawmna a hnar zo lo. Manchester United-in pound maktaduai 27-in Rooney an la lut a, Red Devils bakah England tana goal khung tam ber a ni.

Rooney-a hlawhtlinna hi Everton ṭantute tan hmuh nuam a ni lo a, supporter ṭhenkhat chuan 'Kan thinlungah chuan i thi tawh' tih banner keng hialin an lo chhawn ṭhin. Tunah erawh Rooney-a'n a vanglai hun a hmang zo tawh a, United-ah hmun a chang pha tawh lo, hei hi Everton lama a let tur chhan chu a ni.

Inrinni khan Everton training ground Finch Park-ah Rooney hian medical test a nei a, he thu i chhiar meuh chuan Everton player a ni thei bawk. English striker hian free transfer-in a club hlui hi a zawm a, a hlawh zat tur pound maktaduai 13 aṭanga pound maktaduai 10 chu United-in an pek sak dawn bawk.

Everton ṭantute hian fapa tlanbo hi engtin nge an lo lawm ang tih hi hriat châkawm chu a ni ta.

THIRLNA TAWI
* March thla khan Lukaku hian Hull City lamah goal hnih a khung a, 1985-86 season-a Gary Lineker-a'n league-a goal 20 a khung tlin hnua Everton player zinga khung leh thei hmasa ber a ni.
* Lukaku hi kum 24 tlin hmaa Premier League-a goal 80 khung thei palina a ni a, tun hmain Michael Owen, Robbie Fowler leh Rooney ten an lo ti theih tawh.
* Everton tan Premier League-ah goal 68 khungin Toffees player zinga goal khung tam ber a ni.
* Lukaku hi Premier League sea­son hnuhnung pangaa goal 10 emaw a aia tam khung thei pathum zingah a tel a, Olivier Giroud leh Sergio Aguero te nen huang khatah an awm.