East Bengal-ah Danmawia

I League-a Aizawl FC an champion-na kawnga player thawhhlawk tak R. Laldanmawia chuan East Bengal a zawm a, kum hnih cham turin contract a ziak. 'Sialhawk Express' tia hriat lar hi East Bengal legend, scouting department lama Kolkata club tana thawk chhunzawm Alvito D'Cunha chuan Aizawlah a rawn zin chilh a, Kolkata club zawm turin thutlukna a siam ta a ni.

Mizoram Premier League season hmasa ber best player hian I League leh ISL-ah duhthlan tur nei mah se Kolkata club pan a thlang a, East Bengal a zawm chhan chu Aizawl FC-a a pu hlui Khalid Jamil vang a nih thu Vanglaini a hrilh.

Season hman zawh taka Aizawl FC tana I League match 15-a goal ruk khungtu chuan, "East Bengal hi Khalid Jamil enkawlna hnuaia khel tur an nih avanga zawm ka ni pakhat a, state pawn lama ka vawi khat khelhna tur a ni bawk nen min hrechiangtu coach enkawlna hnuaia khelh phawt ka duh a ni. Hmasawn zel tur kan nih avangin tuna ka mamawh ber chu khelh tam a ni a, ka khelh tam theih ka rinna ka pan bawk," tiin Kolkata club lian a zawm chhan a sawi.

East Bengal hian Tri­ni­dad and Tobago in­ter­national Deon Carlyle Mitchell an lalut bawk a, Major League Soccer lama Vancouver Whitecaps tan pawha lo khel tawh central defender hma hian Willis Deon Plaza leh Mahmoud Al Amna an lo lalut tawh bawk.