Zverev tan Federer a thiam lua

Wimbledon third round inkhelah Roger Federer tan Mischa Zverev hneh turin hna hautak paltlang tur a awm lo. Inrinni zan inkhel pakhat zawkah seeded pahnihna No­vak Djokovic pawhin Ernests Gulbis lakah player ṭha berte zinga mi a nih zia lantirin hnehna a chang ve bawk.

Centre Court-a inkhelah Federer hian darkar khat leh minute 48 chhungin 7-6(3), 6-4, 6-4 in hnehna a chang a, tun hnai kum 15 chhunga a vawi 14 nan third round a paltlangin last 16-ah Grigor Dimitrov nen an inkhel leh dawn.

All England Club-ah Djo­kovic pawhin hmalam a pan zel, darkar hnih leh minute 11 an inkhelh hnuah Latvian tlangval Gulbis chu 6-4, 6-1, 7-6 (7-2) in a hneh. Quarterfinal lut tur chuan Adrian Mannarino a paltlang leh a ngai dawn a ni.

Federer chu Federer

Kum 35 mi Federer-a'n Wim­bledon nomawi vawi sarih a chawi tawh a, All England Club-a a hlawhtlin hnuhnun ber erawh kum 2012 daih tawh kha a ni. Tun ṭumah hian a champion a nih chuan Pete Sampras nen record inṭawm an neih lai (7 titles) a khum ang - Open Era bikah champion thei upa ber a ni bawk ang.

German tlangval Zverev hian January thla khan Australian Open fourth round-ah world number 1 Andy Murray a hneh tawh, player langsar lakah a zam ngai lo - Federer tan pawh zuam sual theih tur a ni.

Amaherawhchu, Swiss star Federer hian inelna neih ṭan hma lama a sawi lawk ang ngei­in attacking game hmuh­nawm a khel a, aces vawi 13 a siam bakah winners vawi 61 tehmeuh vuain unforced errors vawi sarih bak a nei lo - seeded 27-na Zverev tan dan ngaihna a awm lo.

Kumina match 29 a khelh aṭanga vawi 27 chak thei Fe­derer chuan, "First round-ah ka khingpui a inhnuhdawh avangin ka inkhel chau lutuk lo a, ka vanneih phah hle. A tira ka thil tum hmasa chu chawlhkar hmasa zawk paltlang phawt hi a ni a, tunah chuan kar hnihna ṭha taka hmang turin ka bei leh ang," tiin tlak mai a la tum lo hle.

Focus, please!

Centre Court-ah Djokovic-a'n inkhel bul a ṭan fuh lo a, set hmasa berah 4-2 in a hnufual. Australian Open leh French Open ang maiin grass-ah pawh a beiseina thamral leh mai thei dinhmunah a ding. Official nen an inhnial a, Serbian tlangval hian official chu an inkhel ngaih­sak 'focus' turin a hrilh hial!

Che dangdai ve thei tak Djokovic-a'n set hloh tura a lan hnuah game 10 zet la zawnin 6-4, 5-0 in hma a hruai fal zui thei, set hnihnaah game khat hloh ve mah se break point vawi 11 a hmuh zinga ṭum li chhawr

ṭangkaiin hnehna a chang.

World number 10 hlui Gulbis hi an naupan laii Germany-ah tennis an zir ho ṭhin. Hliamin a tihbuai ngun avangin Gulbis hi tunah chuan world number 548 a ni a, nikum French Open hnua a tournament khelh leh hmasa ber a ni.

Second round-ah khan Gul­bis hian winners vawi 60 zet vuain Juan Martin del Potro a hneh thei, Djokovic lakah pawh winners vawi 38 a vawi thei - Djokovic (21) aiin a tam zawk. Mahse, tihsual a ngah bakah set hnihna an khelh laiin a hnungzâng na vangin enkawl a ngai a, a tho chhuak tawh lo.

Kum 30 mi Djokovic chuan, "Ka inkhelh hmasak ho nena khaikhin chuan tun ṭum hi court chhunga ka rilru ka pek nasat ber ṭum a ni hial ang," tiin official laka a ṭawngkam hman 'focus' tho chu amah leh amah infuihna atan a hman thu a sawi.

Grand Slam vawi 12 cham­pion tawh Djokovic-a coach hlui Boris Becker chuan, "Tun­ah chuan chak duha tuihalna a nei leh ta niin ka hria, a chet zia leh aw rawl thlengin a danglam leh ta," a ti. Djokovic hi season hmasa chawhnu lam aṭangin a khel ṭha lo a, world number 1 aṭangin 2-naah a tla hniam tawh.

Inkhel dang

Season hmasa finalist Milos Raonic chuan seeded 25-na Albert Ramos-Vinolas lakah 7-6(3), 6-4, 7-5 in hnehna a chang a, season duhawm hmang mektu Dominic Thiem pawhin world number 67 Jared Donaldson chu 7-5, 6-4, 6-2 in a hneh ve bawk.

Seeded 10-na Alexander Zverev-a'n 6-4, 6-4, 6-2 in Aus­trian tlangval Sebastian Ofner a hneh a, seeded chang phak zingah Grigor Dimitrov, Sam Quer­rey leh Tomas Berdych te pawhin third round an paltlang vek.

Inkhel Thlirna Tawi
Zverev Stats Federer
6 Aces 13
4 Double Faults 1
63/102 (62%) First Serve % In 53/88 (60%)
32/58 (55%) Net Points Won 25/34 (74%)
1/2 (50%) Break Points Won 3/6 (50%)
20 Winners 61
9 Unforced Errors 7
84 Total Points Won 106
5953.0 Distance Covered 4729.3