Championship player manto ber Neves
Wolverhampton Wanderers chuan Championship player manto ber ni turin Porto midfielder Ruben Neves an lalut a, a man zat hi puanzar ni lo mah se pound maktaduai 15.8 vel ni tura ngaih a ni thung.
Kum 20-a upa midfielder hian Wolves tan season nga chhung khel turin contract a ziak a, Wolves boss thar, season hmasaa Porto boss Nuno Espirito Santo enkawlna hnuaiah khel tawhin Championship lamah a zui leh ta a ni. Championship club hian central defender Willy Boly chu Porto aṭang hian loan-in an lalut bawk.
Wolves hian Neves man zat hi puangzar lo mah se an club player manto ber a nih thu an puang a, January-a pound maktaduai 13-a an lakluh Benfica winger Helder Costa kha Championship player manto ber a nih bawk avangin Neves hian record thar a siam tihna a ni.
Champions League-a captain naupang ber ni tura 2015-a Maccabi Tel Aviv an hmachhawn ṭuma captain armband hrengtu Neves chuan, "England-a inkhelh hi ka chak em em ṭhin a, team ṭha tak ka zawm niin ka hria. Tun season-ah pawh result duhawm tak kan neih ka beisei a, season hmasaa ka coach nen kan thawkdun thei tur hi ka lawm hle," a ti.
Wolves boss Nuno chuan, "Kum 18 leka upain captain nichunga Champions League-a Porto ang club lian a kaihruai thei a nih chuan sawitam a ngai tawh lo," tiin an player thar chu a chhuang hle.
Championship club-in Neves an lak theih chhan hi club neitu Fosun International leh Neves-a agent Jorge Mendes inṭhian ṭhat vang nia ngaih a ni a, Chinese sumdawng pawl Fosun hian nikum nipuia Wolves an lei hnuah club transfer record vawi thum an siamna chiah a ni.