Arsenal academy manager tur Mertesacker

Arsenal captain Per Mertesacker-a'n 2017-18 season zawh rualin football khelh a chawlhsan dawn a, season thar aṭangin Gunners academy manager a ni nghal ang.

Germany international hian kum 2011 khan Bundesliga club Werder Bremen aṭangin Arsenal hi a zawm a, match 210 khel tawhin player pawimawh pawl ni ṭhin mah se tun hnaiah hliam a neih ngun avangin a inkhel tam lo.

Season hmasa khan Mertesacker hi a club tan vawi hnih chiah a inlan. A inlanna hnuhnung zawk erawh Wembley Stadium-a Chelsea nen FA Cup final an khelh ṭum kha niin nomawi an chawi theih nana player pawimawh ber pakhat a tling.

Season tharah Arsene Wenger kaihhruaina hnuaiah player a la ni dawn tho a, hetih rual hian naupang chher hriam kawngah a rilru a seng tel ṭan tawh bawk dawn tihna a ni.

Gunners manager Wenger chuan, "Per hian player naupang zawkte entawn turin mize ropui tak a nei, ṭhiante ṭanpui duh mi a nih avangin naupang chher turin a ṭha hle," tiin a player a fak.