NBA player hlawh hnem ber tur Harden

Houston Rockets guard James Harden-a'n a club tan 2022-23 season thleng cham chhunzawm turin contract thar a ziak a, an inremna hi pound maktaduai 176 zet a nih tak avangin NBA player zingah a contract neih lai hi a man a tam ber.

Kum 27 mi Harden hian kum hnih daih contract a la nei mek a, hemi hlut zawng chu pound maktaduai 45.7 a la ni. Kum li daih con­tract a ziah thar hi pound mak­taduai 131 man a ni - a belhkhawmin pound maktaduai 176 chiah a ni.

Kar hmasa khan Stephen Curry-a agent Jeff Austin chuan a player hian kum nga daih contract a ziah tur thu a sawi tawh, Golden State Warriors point guard contract hlut zawng hi pound maktaduai 154 a ni a, NBA player hlawh hnem ber tur a ni hman. Mahse, Harden contract hlut zawng belhkhawm hian pound maktaduai 21 in a rawn khum.

Feet 6 leh inches 5-a sang Harden chuan, "Houston hi ka tan chuan in a ni, he hmuna hun rei zawk ka cham tur hi ka lawm," a ti. Harden hi tun hnai season thum chhung chu NBA Most Valuable Player thlannaah pahnihna a ni ziah.