Defoe-a'n Bradley a thlah ta

Bournemouth stri­ker Jermain Defoe chuan Zirtawpni zana cancer natan chi khat neuroblastoma vanga thi, kum ruk lek mi Bradley Lowery thlahna thu a sawi. English striker chuan, "I tumruhna leh huai­senna hian ka dam chhung zawngin ka nunah thu a sawi tawh ang," tiin 'ka ṭhian ṭha ber' tia a sawi Sunderland fan ruhkawl hi a thlah liam.

England international striker chuan, "Mangṭha le ka ṭhian, ka ngai dawn hle mai che. Pathianin ka nuna a rawn hruai che avang khan ka lawm takzet a, hun duhawm tak kan hman dun avang te khan ka hlim kumkhua tawh dawn a ni. Kan intawn hmasak bera hmangaihna mitmenga min enna kha ka hre reng a, ka tana i hlut zia sawifiah turin thu hian min daih lo ang,"

"Ka nuna danglamna i thlen tam tak hi nang chuan i hrethiam kher lo mai thei. Pathian chuan a angchhungah a pawm tawh che a, keiin ka thinlungah ka vawng reng thung ang. Hahdam tawh rawh bawiha, ka ṭhian ṭha ber," tiin a thlah.

Bradley hian thla 18 leka upa a nih laiin a natna hi a vei ṭan a, nikum khan New York-a a inenkawl nan £700,000 lai khawn chhuah a lo ni tawh. Zirtawpni khan a natnain zual lam a pan thu sawi a ni a, a chhungte chuan July 7 zanah "Kan nau huaisen tak chu Angel ten an hruai ta," tiin a thih thu an puang.