Atletico de Kolkata coach thar Sheringham
Indian Super League club Atletico de Kolkata chuan an coach thar an puang ta - a hming chu Teddy Sheringham a ni.
Kum 1999-a Manchester United treble champion an nih ṭuma player hi ATK technical director thar Ashley Westwood nen an thawk dun dawn a, ISL club dang tan chuan an thawm ringawt pawh 'khurhna' tham a ni.
ATK hian Sheringham indawrna an neihpui hmasak hnuah beisei anga thil a kaltluan loh avangin Westwood lam an hawi a, Bengaluru FC manager hlui hi coach atan lakluh an tum. Mahse, Indian football-a hming chher tak manager hi 'khawvel huap hriat hlawh' manager a nih loh avangin ISL thuneituten an pawm duh lo a, technical director-ah ruat a ni. Kolkata club-in English legend lam an hawi chhunzawm a, manager thar ni turin an lalut ta.
Tu nge Sheringham?
Football ngaina inti tan Teddy Sheringham hming hriat loh a thiang lo. Kum 51-a upa manager hi England tan vawi 51 inlana goal 11 khung thei a ni a, kum 1983 khan third division club Millwall aṭangin a career a ṭan. Kum 1992-93 season-ah Tottenham Hotspur a zawm a, Spurs aṭang hian khawvelin a hmelhriat ṭan.
Spurs-ah season nga a cham chhungin inelna hrang hrangah match 197 a khel a, goal 99 a khungsak. Kum 1997-ah United a zawm a, a zuitu chu nomawi a ni. Teddy hian Old Trafford-ah season li hun a hmang a, match 145 khelin goal 46 a khung - Premier League (3), FA Cup (1), Champions League (1) leh Intercontinental Cup (1) a chawi a, kum 1999 treble champion an nih ṭum khan Champions League final-ah Bayern laka an si phurh sutin 2-1 in an chak.
Mimal chawimawina
Sheringham-a'n English football-ah mimal chawimawina pawh a dawng nual a, ATK lama a player-te tan ani ang thusawi ngaihthlak ṭhat loh a harsa ang! Kum 1992-93 khan Spurs tana a season hmasa ber khelin Premier League-ah goal 21 a khung a, top scorer a ni.
United-a a season hnuhnung ber 2000-01 ah khan inelna hrang hrangah match 42 khelin goal 21 a khung a, PFA Premier League Team of the Year, PFA Players' Player of the Year, FWA Footballer of the Year leh Sir Matt Busby Player of the Year chawimawina a hui vek! Kum 2009 khan English Football Hall of Fame-ah an lawmlut.
Hun hnuhnung
Teddy-a'n United a chhuahsan hnuah Spurs, Portsmouth, West Ham leh Colchester United tan a khel a, 2004-05 season-ah khan West Ham player ṭha ber Hammer Player of the Year chawimawina a la dawng cheu. Championship club Colchester-ah hian 2007-08 season khelin a relegate pui a, inkhelh chawlhsan nan he club hi a hmang zui bawk.
Inkhelh a chawlhsan hnuah 2014-15 season-ah khan West Ham chu attacking coach ni turin a zawm a, mahse May 2015-ah khan League Two club Stevenage chu coach ni turin a zawm. Mahse, Teddy-a'n coach puitling hna a thawh hmasak berna hmunah a beisei ang hlawhtlinna a hmu lo a, February 2016 khan relegate thei dinhmuna an din laiin ban a ni - match 33-ah vawi sarih chiah hnehna chanpuiin a win percentage hi 21.2% a ni.
Teddy & Ashley
Indian football-ah tu nge Ashley Westwood tia zawhna siam nawn a ngai tawh lo. English manager hian Bengaluru-ah season thum hun a hman chhungin I League nomawi pahnih leh Federation Cup a chawi thei a, ram pawn coach zingah ani tluka Indian football hrechiang tur an awm chuang lo.
Manchester United academy aṭanga zir chhuak Westwood-a Indian football hriatna leh khelmual chhunga tawnhriat ngah tak Teddy-te thawkdun tur hmuh a chakawm hle.
Ashley-a'n Bengaluru a enkawl chhungin tlarhnung a ngaipawimawh tih a lantir a, coach dangten sum an sen hnem ṭhinna foreign striker aiin tlarhnungah Curtis Osano leh John Johnson-a sum sen hnem a thlang a, attacking coach a nih laia Hammers-in tlarhmaa hma an sawn phahna tia sawi Sheringham nena an inkawpna hnuaia ATK khel hi Indian football ngainatu te hmuh chak chu a ni.