Sania Mirza ten third round lut

Indian tennis star Sania Mirza leh a kawppui Kirsten Flipkens te chuan British pair Naomi Broady leh Heather Watson te ṭangdun hnehin Wimbledon hmeichhe doubles third round an lut.

Inrinni zan inkhelah Sania leh Kirsten te hian darkar khat leh minute 45 chhungin 6-3, 3-6, 6-4 in hnehna an chang. Indo-Belgian pair hian seeded pathumna Martina Hingis leh Yung-Jan te ṭangdun an hmachhawn leh ang.

Second round inkhel dangah Sania kawppui hlui Hingis leh Chan-i te hian Russian pair Vero­nika Kudermetova leh Natela Dzalamidze te chu 6-1, 6-3 in an hneh ve bawk a ni.

Mipa doubles lamah veteran Leander Paes leh a ṭanpui Adil Shamasdin te chu inkhel inhneh­tawk takah 6-4, 6-4, 2-6, 6-7(2), 8-10 in Julian Knowle leh Philipp Oswald te lakah an chak lo.

Kum 44 mi Paes hi Wimbledon-ah vawi 23 a inlanna a ni a, kum 1999 khan doubles-ah nomawi a chawi tawh. Doubles bikah hi chuan Australian Open, French Open leh US Open pawh a chawi ve tawh a ni.