Kum 10 hnuah Mizoram Police an champion
Mizoram Police chuan I League club Aizawl FC chu 2-0 in an hneh, kum 10 hnua top flight football-a an champion lehna hmasa ber a ni.
Nimina Lammuala I Day Football 2022 final-ah Police tan Laldawngliana Colney leh Lalbiakhlua ten goal mawi tak an khung a, Aizawl FC-in a chhan letna tur an nei lo.
Kum 2012 khan Police hian Aizawl FC hnehin I Day Football-ah an champion a, kum 10 hnuah Lalbiaksanga Colney hoin I Day Football-ah bawk Aizawl FC hnehin an champion.
Goal ṭha 1
Aizawl FC-in game mawi an khel a, passing game ṭha tak khelin a tirah an chungnung zawk. Chutihrualin wing back R. Lalthanmawia (Amawia) damloh an tuar a, ṭum dang aiin mual sir ṭanga an goal bawh a na lo.
I League club tana semi final-a chakna goal khungtu Jeremy Laldinpuia a hmuhnawm a, Dindina hi Police tlarhnung tan a hnawksak hle.
Chutihrualin Aizawl FC hian chance ṭha an insiam thei meuh lo a, R. Ramdinthara'n (Tharpuia) a hun ṭha neih tur a la thla fuh lo chu goal-ah a chantir theih loh phah.
Inkhel pumpuia langsar ber erawh Police striker Malsawmfela a ni a, Ramhlun South striker hi thau deuhin lang mah se a fitness a chhe lo a, a che vel hmuhnawm a tling.
Police pawhin Aizawl FC tlarhnung an ṭhiat thei bik lo a, Lalnunsanga (Talea) chuan AFC goal ban a pet per a; Sawmfela'n corner kick -a ball lo kal chu crossbar chungah chiah a tauh.
Injury time-ah goal ṭha bik hmuh a ni - Sawmfela'n Aizawl FC captain Lalmuanawma chu ball a lak khalh a, chumi kal zelah Laldawngliana'n kawh zetin goal kilah a khung. Goal ṭha bik a ni.
Goal ṭha dang
Second half-ah Mizoram Police-in an goal neih humhim tumin an khel a, an tawnhriat ṭha tak nen inkhel an tithi thiam hle.
Aizawl FC-in chance insiam an harsat a, Police tlarhnung an khel ṭha. Semifinal angin Aizawl FC coach Lalrozama Fanaiin substitution a siam fuh lo a, bench aṭanga rawn lutten inkhel an thlak danglam lo. Chuti chung chuan si phurh sut theihna erawh an nei thung.
Box pawn aṭanga Dindina ball pet kawh tak chu keeper F. Lalmuanawma'n a dansak a, substitute David Lalhlansanga'n box chhungah vengtu nei lo chungin goal zawnah a tauh lo.
Hun tawpah tawnhriat nei player danglamna a lang a, ball per changfuhtu Lalbiakhlua (Hlutea) chuan mual sira awm Lalbiakhlua (Biaktea) a pe a, captain Biaktea hian mawi zetin keeper a pet khum a, chak nemnghehna goal a khung.
Police an tar tawh em?
Police player-te hi upa deuh tawh mah se an la thiam reng a, an champion leh ta - an player Sawmfela, MS-a leh F Lalrinpuia (Valpuia) te hi 2005-a Mizoram Sub Junior team-a khel tlâng tawh an ni a, he mi ṭuma an captain chu tuna Aizawl FC coach Rozama hi a ni!
Kan ṭanrual rah kan seng - Bsa Colney
Mizoram Premier League ṭan hma khan First Division-ah Police team pahnih1st Bn MAP leh 3rd Bn MAP an awm ṭhin. MPL-ah Police team hnih chu team khatah chhung khawmin Mizoram Police tih an ni a, an squad pawh a chhah ṭha. I Day Football final-ah khatih laia I League khelh ṭuma team in thuam ṭha Aizawl FC an hneh.
Amaherawhchu Police-in beisei ang result an nei chhunzawm lo a, inelna sang ber MPL-a an champion theih loh bakah I Day Football leh MFA Super Cup-ah pawh an champion thei lo. MPL-ah phei chuan relegate ṭum an nei hial. Tun season-ah Police-in an record ṭha lo nuai reh tumin theihtawp an chhuah a, team dang zawng aia training an neih hma bakah an ṭangrual hle.
Police coach Lalbiaksanga Colney chuan, "Champion hi kan beisei ṭhin a, a taka han chan chiah chuan a lawmawm hle a ni. Kan hotuten min thlawp ṭha a, kan DGP te leh kan IC 3rd Commandant leh Board of Director hoin min phurpui a, inkhelh apiangin a hmunah min ṭawiawmin, fuihna thu min fah reng a, kan chakna pakhat a ni e. An chungah thinlung takin lawmthu ka sawi. Kan thawkrim a, kan vai ṭanrual rah a ni," tiin Vanglaini a hrilh.
BS-a Colney hian Inter Village Football 2022-ah Armed Veng a enkawl a, team tenau Bungkawn an hneh lo. Hemi aṭanga a inzir thu sawiin BS-a chuan, "Eng team mah hi dah hniam a thiang lo a, kan tihsual aṭangin kan insiamṭha. Armed Veng kan chak loh kha ka thiam loh a ni a, khata ṭang khan ka insiamṭhat bakah chak duh lehzualna min pe," tiin a sawi.
Thlirna Tawi
Mizoram Police 2 - 0 Aizawl FC
MPFC : Laldawngliana Colney 45+1';
Lalbiakhlua 90'
Lawmman
Champion : Mizoram Police
Rs 1,00,000 + Trophy
Pahnihna : Aizawl FC Rs 50,000 + Trophy
Fairplay : FC Bethlehem Rs 20,000 + Trophy
Semifinalist : Venghnuai FC &
Chhinga Veng Rs 40,000
Best Player : H. Lalbiakthanga, Mizoram Police Rs 3,000 + Trophy
Top Scorer : Lalrammuanpuia, FC Venghnuai (5 Goals) Rs 2,000 + Trophy
Champion tawhte
Kum Champion
1982 1st Bn MAP
1983 1st Bn MAP
1984 1st Bn MAP
1985 1st Bn MAP
1987 1st Bn MAP/Power Dept
1988 Aizawl FC
1989 PWD SC
1990 1st Bn MAP
1991 1st Bn MAP
1992 Power Dept SC
1993 PWD SC
1994 1st Bn MAP
1995 PHE SC
1996 Aizawl FC
1997 1st Bn MAP
1998 1st Bn MAP
1999 1st Bn MAP
2000 1st Bn MAP
2001 Vaivakawn SC
2002 Ramhlun SC
2003 1st Bn MAP
2004 FC Kulikawn
2005 Dinthar FC
2006 3rd Bn MAP
2007 ARC, Shillong
2008 1st Bn MAP
2009 RC FC, Leitan
2010 1st Bn MAP Academy
2011 Shillong Lajong
2012 Mizoram Police
2013 Chanmari FC
2014 Dinthar FC
2015 Aizawl FC
2016 Aizawl FC
2017 Chhinga Veng FC
2018 Chhinga Veng FC
2019 Electric Veng FC
2022 Mizoram Police FC