G90's an thiam ber

G90's chuan Hming­thansanga leh Ari Benjamin LR Hmar te goal hmangin Mizoram Police 2-1 in an hneh a, team 21 telna I Day Veteran Football-ah an champion.

Final hi nimin khan Lam­mualah khelh a ni a, hranghlui inkhelah goal mawi pathum a lut.

Minute 12 -naah TBL club vanglaia khel dun ṭhin Hmingthana (Aizawl FC technical director) leh Ari ten wall pass hmangin Police tlarhnung an ṭhiat a, Hmingthana'n cool zetin a khung. Ari-a'n minute 32-naah box pawn aṭangin kawh zetin a pet goal - striker goal dik tak a ni.

Police lamin first half injury time-ah David MS Tluanga hmangin si phurh an sut ṭhen a, Police striker hian box chhung aṭangin kawh zetin a khung.

Second half-ah goal luh belh lo mah se nuam sain G90's an awm lo. Police lamin Maneiha hmangin penalty an beisei a, pek an ni lo.

G90's an ṭang tluan a, 2-1 in an chak. G90's chairman HF Lalrinpuia chuan, "Football hi Pathian rawngbawl nan a tlak tih kan hria a, kan vanglaite lo liam mah se tlai ngai lo Pathian rawng hi kan bawl zel ang. Chumi tur chuan he Championship trophy hi kan dil a, kan dilna tlawm takte Lalpan min hriatsak a, vawiin niah champion ni hmel, a rawngbawl nan min pe ta a ni.

"Player te, coaching staff te leh min support-tute chungah Pathian hmingin lawmthu ka sawi. Kan innghahna, 'Nang malsawmna ni ang che,' (Genesis 12:1-3) tiin kan lawmthu sawina hi kan khar ang e," tiin Vanglaini a hrilh.

G90's hian an nomawi hi an member chatuan ram pan ta Lalhmangaiha, Benjamin Zonunsiama leh Ramzidinga te tan an hlan a ni.

G'90's coach HC Zarzoliana hian sub junior aṭanga senior bakah, tunah veteran inelnaah a team a champion-pui kim ta.

Thlirna Tawi
Mizoram Police Veteran 1-2 G90's
MRP: David M.S. Tluanga 35+1'
G90: Hmingthansanga 12'; Ari Benjamin L.R. Hmar 32'
Champion: G90's Rs 30,000 + Trophy
Pahnihna: Mizoram Police Veteran
Rs 15,000 + Trophy
Fair Play: G90's Rs 10,000 + Trophy