London Derby Boruak a Hot ; Conte leh Tuchel an hnawtchhuak
Premier League a ni miau a, a mak hran lo e. Chelsea leh Tottenham Hotspur te 2-2 a an inhnehtawkna inkhelah Thomas Tuchel leh Antonio Conte te hnawhchhuah an ni a, hamrik hnuhnung ber a rik hnu chu boruak san lai ber a la ni chauh!
Stamford Bridge-ah Blues lamin Kalidou Koulibaly leh Reece James te hmangin vawi hnih hma an hruai hmasa, mikhual lamin Pierre-Emile Hojbjerg leh Harry Kane te hmangin an sut ve ve, point khatah an lungawi a ṭul.
Pathianni zan inkhel dangah Nottingham Forest chuan, forward Taiwo Awoniyi-a goal khat hmangin West Ham United 1-0 in an hneh. Kum 23 liam hnuin City Ground-ah EPL an khel leh a ni a, an tan chuan hun chhinchhiah tlak a ni chiang.
Inhnehtawk
Chelsea lamin first half an thunun a, an phu ang ngeiin goal pawh an nei. Marc Cucurella-a corner pet chu defender Kalidou Koulibaly chuan a lo hlap lut. Boruaka ball a kan laiin Napoli defender hian mawi zetin a hlap a, keeper Hugo Lloris tan dan ngaihna a awm lo.
Spurs tan striker Kane-a'n hun ṭha bik a hlah a, second half-ah erawh Pierre-Emile Hojbjerg hmangin siphurh an sut hlauh, keeper Edouard Mendy-a'n a lira ball kal a dang phak lo, goal kilah tak lutin 1-1 a ni.
Kai Havertz titlutu Rodrigo Bentancur chu hrem tur niah Blues lamin an ngai a, mahse referee Anthony Taylor-a ngaihdan erawh a ni ve lo. He thil thleng avang hian manager pahnih Tuchel leh Conte te chuan yellow card an hmuh phah.
Tlarhma laia tlan Raheem Sterling-a siamsak chu changtu nei lo James-a'n a khung a, an goal hnihna lawm hian Tuchel chu Conte lamah uar takin a tlan phei a, hei hi Italian manager chuan a lo hmu lo! An lama goal lut pawi a tih avangin a kun lai a ni.
Chelsea-in an chak dawn emaw an ti hman, mahse hun tawp dawnah Kane-a'n corner aṭanga ball kal a tauh lut a, team pahnih tan goal khung lehna hun remchang a awm tawh lo, chak phu inti team pahnih hi point khatah an lawm lo.
Chelsea an lawm lo
Referee Anthony Taylor-a'n Havertz laka foul Bentancur a hrem lo kha Chelsea-in mak an ti a, Spurs goal hnihna luh dawna Cucurella lak thil thleng a hmu lo nawn chu an hrethiam thei lo zual, thil thlen lai hian player pahnih hnung lawkah referee hi a awm.
Ivan Perisic-a'n corner a pet dawnin Cucurella hi a samah Spurs defender Cristian Romero chuan chiang zetin a kek! Thil thleng hi video assistant referee hmanga endik a ni a, kek chiang viau mah se foul ham loin corner an pe zui.
Corner aṭanga ball kal Kane-a'n a tauh lut zui a, engkim a danglam zo ta - siamṭhat theih lah a ni hek lo. Chelsea tan a pawi a, referee Taylor leh VAR lama ṭhu Mike Dean chungah an lawm lo, hun tawp dawna thil thleng hian a tir lama thutlukna thlengin a kai tho.
Spurs an vannei
Chelsea khelmual a ni a, a khel ṭha zawk pawh Blues an ni. Mahse, Tottenham-in point an hlawh chhuak thei a, season hmasa tir lama an team rilru put hmang leh Conte an neih hnua an rilru put chu a inang ta lo hle - an huaisen tlat tawh.
Premier League champion a nih tawhna hmunah Conte a zam eih lo, midfielder Hojbjerg-a'n an si phurh a sut khan Italian manager hian uchuak deuh takin a lawm a, mual chhunga a naute an chet fuh leh chhan an ngaih deuh laiin mual sirah thawm a lo nei na thei hle bawk.
Italian manager Conte hi nungchang maksak tak chu a ni sa ve hrim hrim, a club hlui mitmei pawh a veng hran lo. Amah leh a enkawl club hlawhtlin theihna tur a nih phawt chuan zahpah a nei lo, chuvangin Spurs hian club lian an el ngam dawn.
In chibai = Red card
Inkhel a zo a, tawnhriat nei ṭha manager Antoni Conte-a'n lungawi lo tih hriat sa takin Thomas Tuchel a va chibai - inkhelh bana manager pahnih in chibai ṭhin chu a tih hmaih duh bik lo, lungawi bik lo Tuchel nen an kut a in tawk chiah chu a nghet chat.
Conte nge Tuchel zawkin hum nghet hriat a ni tawh lo, manager pahnih hi an indinchilh zui a, midangin an pawh ṭhen an ngai hial. Kut inthlak lo mah se manager pahnih an lawm lo takzet a, referee Anthony Taylor-a'n an pahnihin red card a pe.
Chelsea manager Tuchel chuan, "Tottenham lam goal pahnih kha chu pawm lo tur niah ka ngai, inthlahrung leh hrehawm ti tak chungin referee khan hna a thawk ṭha lo tih ka sawi a ngaih phah a ni. Kai-a lakah an foul a, Richarlison kha a offside bawk.
"Engtik laiin nge football-ah hian sama pawh (kek) hi an phal? Goal hmasa kha offside avanga khung an ni a, a hnuhnung zawk kha chu kan player sama kek chungin an khung. Hetiang thutlukna hi chu an sawifiah phawt loh chuan pawm mai theih a ni lo," tiin a lungawi lo hle.
Tottenham manager Conte chuan, "Inkhel hautak tak a ni. Chelsea hi team ṭha leh khawng tak an ni a, anmahni khelmual a nih bawk avangin a awlsam lo. Mahse, season hmasa ni loin, tun hnai thla ruk chhunga kan hmasawn dan en erawh chuan kan khelh dan kha a lawmawm.
"Tun aia ṭha zawk khan kan la khel thei tih a chiang, chutih rualin Chelsea lakah goal hnih kan khung thei kha a ṭha, kan intawn hnuhnung pathumah goal kan khung lo a ni. Ka naute khan a tawp hma chu huaisen takin an bei a, point kan hmuh theih phah," a ti.