Champion lai Real an chak nghal
Barcelona-in an match hmasa berah goal an khung lo a, transfer bazar-a sum tam tak senga 'risk' an lak chhan, an elpui ber Real Madrid erawh an match hmasa berah an chak nghal - Almeria chu 2-1 in an hneh.
Mahse, Carlo Ancelotti enkawl team hi Barca lakah inchhuang viau thei an ni bik lo a, kai thar Almeria laka hnehna chang turin vanneihna an mamawh tel ve tho.
Almeria khelmualah Real-in goal an chhuah hmasa zawk a, Largie Ramazani chuan minute ruknaah goal khungin La Liga champion a lo 'barakhaih' a, rei tak a hnufual zawkah an ṭang.
Mahse, team ṭha zawk danglamna a tawpah hmuh turin a awm a, Lucaz Vazquez leh David Alaba ten second half-ah goal an khung a, an match hmasa berah point thum nen bul an ṭan.
Rin loh lam
2014-15 season hnua a vawi khat nan Almeria-in La Liga an khel ve leh ta a, Segunda division champion hian an match hmasa berah champion lai Real Madrid an mikhual zui.
Team pahnih squad khaikhin chi a ni lo a, player hlawha an sum sen ral zat pawh khaikhin rual a ni lo. Mahse, football-in thil mak a thlentir fo ṭhin a, hringnun thawnthu ngaihnawm tak min chhiartir fo.
Almeria-in chhuan tur nei lo mah se beiseina an nei a, inkhel ṭan aṭanga minute rukna lekah goal hmahruai an khung nghal - Manchester United striker hlui Largie Ramazani chuan offside trap bumin ṭha zetin goal a khung.
Real an hawihai a, na takin Almeria nawr zui mah se goalkeeper Fernando Martinez chet ṭhat zan an tawng a, first half tawp hmain Vazquez chuan si phurh a sutah inngai mah se offside vangin pawm a ni lo bawk.
A tawpah Real
Minute 61-naah Real-in goal an khung ta nge nge. Inkhelh chhung zawnga hmuhnawm Vinicius Jr-a chance neih chu Fernando bawkin a dang a, mahse, a per lehlam chu Karim Benzema ke bulah a tla.
French striker-in a duh ang thala ball a control hmain a per leh a, hei hi Vazquez chuan harsatna nei loin goal-ah a lo chantir a, European champion-in si phurh an sut avangin an phur sawt.
Hun tawp nan minute 16 a la awm a, Ancelotti-a'n chak duhin bench aṭangin David Alaba a luhtir a, khelmualah minute khat pawh a hmang tling hman lo. Ferland Mendy thlaktu defender hian freekick a pet a, mawi zetin a chhuih lut.
Ancelotti-a'n thutlukna dik a siam tih a takin a lang a, Italian coach kaihhruaina hnuaiah Real an chak leh ta - UEFA Super Cup nomawi an chawi tawh a, nomawi chawi kim vek an tum.
Real an ṭha
Madrid khaw club-in hma takah goal an chhuah a, hun tawp hnaih lamah chakna goal an khung leh chauh avangin Ancelotti naute hi an vannei tih rual a ni lo a, chutihrual chuan an thiamna erawh sawi hmaih a rem lo.
Real hian 68% zet ball chang chungin vawi 29 shot an nei a, heng zinga vawi 15 hi target zawnah a kal thei hial - hemi bik thlir hian Real an vanduai a, mahse, Almeria vanduaina sawi hmaih a rem lo.
Kai thar team hian La Liga-a an kir lehna hmasa berah mikhual zakzum awma awm an tum lo a, vawi 10 zet shot neiin, heng zinga vawi ruk chu target zawnah a kal ve tho.
A bik takin Almeria tana Rodrigo Ely goal khung loh kha uiawm a tling. Curro Sanchez-a free-kick aṭanga ball kal chu Ely hian khungna remchang a nei a, mahse, uiawm takin Thibaut Courtois zawnah chiah a tauh.
Valencia an chak
Player a nih lai aṭang tawha rorum ve tak Gennaro Gattuso chuan Valencia a enkawl hnua league match hmasa berah a team hnehna a chanpui nghal a, mikhual Girona lakah 1-0 in an chak.
Valencia goal awmchhun hi Carlos Soler-a'n penalty aṭanga a khung a ni a, Girona wing back Valery Fernández-a handball vanga an penalty hlawh hi Soler chuan harsatna nei loin goal-ah a chantir a ni.
Hetihlai hian Valencia centre back Eray Cömert chu Girona forward Valentín Castellanos laka a chet dan avangin minute 52-naah hnawhchhuah a ni a, a tirah hnawhchhuah ni lo mah se referee-in video assistant referee rawnin red card a pe a ni.
Tun hnaia Spanish club ṭhangduang tak Real Sociedad pawhin hnehna an chang a, an mikhualna ramah Cadiz chu 1-0 in an hneh - Japanese winger Takefusa Kubo chuan minute 24-naah inkhela goal awmchhun hi a khung.
August 12, Zirtawpni Zan
Osasuna 2 - 1 Sevilla
OSA: Ezequiel Ávila 9'; Aimar Oroz 74' (P)
SEV: Rafa Mir 11'
August 13, Inrinni Zan
Celta Vigo 2 - 2 Espanyol
CEL: Iago Aspas 45+2'; Gonçalo Paciência 63'
ESP: Edu Expósito 72' ; Joselu 90+8' (P)
Real Valladolid 0 - 3 Villarreal
VIL: Nicolas Jackson 49'; Álex Baena 81', 90'
Barcelona 0 - 0 Rayo Vallecano
August 14, Pathianni Zan
Cadiz 0 - 1 Real Sociedad
RES: Takefusa Kubo 24'
Valencia 1 - 0 Girona
VAL: Carlos Soler 45+1' (P)
Almeria 1 - 2 Real Madrid
ALM: Largie Ramazani 6'
REM: Lucas Vázquez 61'; David Alaba 75'
Nizan Inkhel (Result kan hre hman lo)
Athletic Bilbao 09:00 PM Real Mallorca
Getafe 11:00 PM Atletico Madrid
Real Betis 01:00 AM Elche