Busta tan Masters 1000 title hmasa

Grand Slam dawta inelna ngaihhlut Masters 1000 title chu Carreno Busta-a'n a vaw chhuak ve ta. Nimin zinga khelh zawh tak Canadian Masters-ah Busta hian Hubert Hurkacz chu 3-6, 6-3, 6-3 a hneh in a champion.

Spanish player hi seeded pawh ni phak lo a ni a, stadium khat tlata entu pungkhawm leh a hmaa ding Hurkacz lakah erawh a zam chuang lo. Set hmasa ber hloh mah se a buai phah lo a, set hnuhnung pahnihah a khingpui service vawi thum chhuhsakin a ding chang.

Kum 31 mi Busta chuan, "Hetiang hun thleng tur hian duh thu ka sam nasa ṭhin lutuk, mumang ramah ka cheng, khawngaih takin min tiharh lul suh u," tiin nomawi lian tham chawi chu tennis a khelh tirh aṭanga a suangtuah ṭhin a nih thu a sawi.

A vanglai pelh tawh lamah nomawi lian tham a chawi ve chauh a ni a, a tan chuan ni chhinchhiah tlak a ni ngei ang. Mipa world ranking chhuak tharah pawh 23-na aṭangin 14-naah a kaisang dawn, a tan chuan chanchin ṭha a ni zel.

Busta chuan, "Nomawi ka chawi a, chumi bakah chuan ranking point 1000 ka hmuh belh bawk. Match hmasa bera Matteo Berrettini ka hneh aṭanga match hnuhnung bera ka khelh thlengin ka tan chuan a nuam em em vek," tiin a sawi.

Tennis season kal laia Grand Slam hnuhnung ber US Open chu August 29 aṭangin khelh a ni dawn a, hard court inelna lama a chet fuh avangin major tournament atan pawh beisei a nei sang chhunzawm ang.