Chelsea dawrna Everton-in hnar

Duhthusama nipui transfer bazar la hmang lo Chelsea-in inlei belh an la tum zel a, mahse, Everton aṭanga rawlthar ṭhangduang Anthony Gordon lakluh an tumna chu Merseyside club hian an lo hnawlsak.

Chelsea hian Gordon hi pound maktaduai 40-a lakluh tumin Toffees (Everton sawina) hi an dawr a, mahse, Frank Lampard-a enkawl team hian kum 21 mi forward hi hralh tumna an nei lo.

England Under-21 international hi lakluh ngei tumin Chelsea chuan Everton hi an dawr nawn dawn nia sawi a ni a, Gordon hian an lung a len miau avangin £40mtd aia tam pawha lakluh an inhuam.

Chelsea hian pawisa bakah player pek tel pawh an inhuam nia sawi a ni a, Everton hian Chelsea player beiseiawm Armando Broja leh Conor Gallagher te chu an lo hmu tai tawh - player pahnih hi Tottenham Hotspur nena an inkhelah bench aṭanga luhtir ve ve an ni.

Everton hian nipui transfer-ah Richarlison chu Spurs lakah an chân tawh a, striker rinrawl Dominic Calvert-Lewin a inhliam mek bawk avangin Gordon hi Everton match hmasa pahnihah number 9-ah a khel ve ve.

Gordon hian December 2017 khan Everton tana a match hmasa ber a khel a, Premier League bikah erawh January 2020 khan a match hmasa ber a khel ve chauh.

Everton tana hmun pawimawh a chan phak tak erawh season hmasa chauh kha a ni a, inelna hrang hrangah match 40 khela goal li khungin, assist vawi thum a nei a, Liverpool academy-ah pawh lo inzir tawh ṭhin player hian hmabak a nei êng hle.