Villarreal tana khel tur Lo Celso

Tottenham Hotspur midfielder Giovani lo Celso chuan season khat chhung loan-a khel turin Villarreal a zawm a, season hmasa chanve kha Spanish club-ah hian loan thoin a lo khel tawh.

Kum 26 mi Lo Celso hian Argentine club ṭha Rosario Central aṭangin a professional career a ṭan a, a hnuah Paris Saint-Germain leh Real Betis tan a khel. Betis-ah hian season khat chiah hun a hmang hman a, kum 2019 khan Spurs a zawm.

London club a zawm hian season khat atan loan-in a zawm phawt a, January 2020 khan a loan hi tihngheh niin Spurs hian pound maktaduai 27.2-in an lei.

Spurs tan hian match 84 khelin goal riat a khung a, assist vawi ruk a nei. Mahse, January 2022-ah Villarreal hi loan-in a zawm a, inelna hrang hrangah match 22 khelin goal khat a khung a, assist vawi khat a nei.

Unai Emery enkawlna hnuaiah Lo Celso hian Villarreal chu Champions League semifinal a hruai thleng a, Spanish club hian a ngheta lalut tur anga sawi zui a awm hial.

Mahse, Spurs hian Argentina international manah hian £17mtd an phut nia sawi a ni a, Villarreal hian loan bawkin an hawh leh ta zawk a ni.