A vawi thum nan Halep a champion

Simona Halep chuan Beatriz Haddad Maia hnehin Canadian Open nomawi a chawi. Toronto-a hard court inelnaaah hian Romanian star hi vawi thum a champion tlinna a ni a, tun hnaia result a neih ṭhat tawk lohna chu a hliahkhuh.

Wimbledon 2019 champion hian Haddad Maia-i hi 6-3, 2-6, 6-3 in a hneh. Masters title a lak leh tak avangin tun kara world ranking chhuak tharah chuan parukna a ni leh thei dawn, major tournament khelh hmabak US Open atan ranking sang hi a pawimawh ang.

Kum 30 mi Halep hi hliam vangin a inkhelh pangngai lohna a rei tawh, a inkhelh chhunah pawh beisei a phak lo ṭhin. A hliam tirh khan world number 2 a ni a, kumin tir lamah kha chuan a sang zual 20 zingah a tel phak lo lek lek ṭhin.

Grand Slam vawi hnih champion tawh Halep chuan, "Inkhel harsa tak chu a ni. Haddad Maia khan ball a vaw vir nasa hle a, a ball vuak a na bawk. A khelh dan phung man thiam tur khan rilru ka sen rei a ngai rei angreng hle.

"Season tir lama ka dinhmun ka ngaihtuah a, tunah chuan ranking sang zual 10 zingah ka tel ve leh dawn ta reng mai. Hliam leh harsatna hrang hrangin min tlak buak lai kha chuan hetiang hun hi ngaihtuah ngam a har," tiin a sawi.

Season kal laia Grand Slam hnuhnung ber US Open chu tun thla chawhnu lam aṭang hian New York khawpuiah an khel ang.