Vawiinah MPL club pathum Bethlehem VT, Chhinga Veng, Chanmari West
Lalbiakliana Memorial MFA Super Cup 2017-ah Mizoram Premier League club pathum Bethlehem Vengthlang, Chhinga Veng leh Chanmari West te vawiinah an inlan vek dawn a, chak vek tura ngaih ni mah se Durtlang FC, Zo Dreams FC leh Lungleia inbengbel SYS Academy ten barakhaih an tum ang.
Tualchhung football-a knockout football tournament ṭhang duang chho mek MFA Super Cup-ah vawiin aṭangin Lammualah second round khelh a ni dawn a, Rajiv Gandhi Stadium-ah erawh naktuk thlengin first round la khelh tur a ni.
BVT ṭha zawk
Bethlehem Vengthlang FC-in coach Chawngthansanga hnuaia an match hmasa berah Aizawl FC Academy U18 chu penalty shootout-ah an hneh a, he inkhel aṭanga lungawina tur awmchhun chu second round an lut hi a ni.
BVT coach Chawnga'n an match hmasa ber an khelh ṭhat tawk loh chhanah training-na hun an neih ṭhat lawk lo chu a puh a, chhuanlam ṭha tak a ni. Tun ṭumah erawh kar khat inpuahchahna hun an neih tawh avangin Durtlang FC lakah game ṭha zawk an khelh a beisei theih ang.
Durtlang FC hi second division club ni mah se MPL-a tawnhriat nei ṭha an veng tlangval MS Dawngliana (Valpuia) te an chelh thei a, Luangmual FC player hlui Valpuia hian match hmasa bera AFC Academy U16 an hneh ṭumin goal awmchhun a khung.
BVT leh Durtlang chak zawk hian bye vanga vawi khat inlanna tur Bethany FC, Bawngkawn leh FC Venghnuai chak an hmachhawn ang. First division club FC Venghnuai hian Bungkawn FC 4-0 in an hneh tawh a, third division club Bethany FC tan chak turin vanneih a ṭul ang.
Rinkai Chhinga Veng
MPL Super Cup-ah transfer laia thawm nei lian ber Chhinga Veng FC chu champion tura rinkai an ni a, vawiin Lammual match hnuhnung berah Zo Dreams FC tan mang chhia an thlen ngei a rinawm.
Chhinga Veng hian coach Lalsangzuala Hmar hnuaia an match hmasa berah Mizo footballer langsar rual enkawlin Zarkawt FC chu 9-0 in an sawp. Chhingcows hian tualchhung football tuichilh hoin player ṭhaa an hriat lak theih remchang apiang an lalut zel a, mi tam takin mamawh bak aia tam laah an ngai ve bawk.
Sanga hian tlarhmaa ringawt pawh chhawr theih turin Malsawmfela, Lalrammuanpuia, MS Dawngliana leh Lalkhawpuimawia te an kawl a, position tinah Mizoram aiawh khel tur an kawl vek.
Zo Dreams-in Chhinga Veng an hmachhawn dawn miau avangin pool final luh theih dan awmchhun chu ṭan phat aṭanga tlarhnung rem phui a ni a, minute 90 chhung goal an chhuah lo a nih pawhin penalty hmanga an vanneih a ṭul ang.
Hei le, West Warrior
Rajiv Stadium-ah tun season-a a vawi khat nan Chanmari West FC an inlan dawn a, coach HC Zarzoliana'n CYMA Football-ah an veng Ramhlun South a champion pui zo chiah a, West Warrior pawh hian belhchian an dawl ang.
Tun season-a team naran tura ngaih Chanmari West-in transfer ṭan tirh laia thawm an neih loh hnuin a tawp lamah champion an tum tih pholangin player ṭha an lalut.
Shillong Lajong aṭanga MPL club zawmtu Jacob Lalrawngbawla chuan vawiin hian West Warrior jersey a rawn ha dawn a, tlarhma lamah Lalnunmawia leh Vanlalthlamuana te an awm avangin an goal nawr pawh a na tura ngaih a ni.
Tlarhnungah Bawngkawn tlangval Ronald Zothanzama a awm dawn a, goalkeeper-ah pawh a thiam zia an sawi uar nana thlawk thei ang hiala an sawi ṭhin Vanlalhriata an kawl a, amaherawhchu veteran keeper hi vawiinah chuan a la inlan lo ang.
Amaherawhchu, Chanmari West hian season liam ta khan MFA Super Cup first round-ah Chawnpui FC an hneh lo nghal a, tun ṭuma an khingpui tur SYS Academy hi vanduai theihna an ni. Lungleia inbengbel SYS Academy hi kum tluana training nei an ni a, vawiin hi Sports & Youth Services hnuaia football academy fiahna tur a ni.
Vawiin Inkhel Tur
LAMMUAL
Group A - Second Round
10:00 AM Bethany FC, Bawngkawn Vs FC Venghnuai
12:00 PM Bethlehem VT FC Vs Durtlang FC
GROUP B - Second Round
02:00 PM Zo Dreams FC Vs Chhinga Veng FC
RG STADIUM
Group G - First Round
11:00 AM SYS Academy, Lunglei Vs Chanmari West FC
01:00 PM Hunthar FC Vs Kanan FC
Group H - First Round
03:00 PM Asanga Memorial FC Vs Chite Veng GSA