Chelsea defender thar Rudiger
Premier League champion Chelsea chuan Germany defender Antonio Rudiger chu AS Roma aṭangin an lalut.
Kum 24-a upa Rudiger hian Blues tan kum nga daih contract a ziak a, a man zat hi pound maktaduai 29 niin pound maktaduai 34 thlenga pung chho leh thei a la ni.
Bundesliga club VfB Stuttgart aṭanga senior career bul ṭantu Rudiger hian tun thla tira Russia-a khelh zawh tak 2017 Confederations Cup-ah khan an ram Germany a champion pui a, nomawi an chawina kawngah player pawimawh a ni phak.
Blues jersey number 2 ha tur Rudiger hi tun nipui transfer chhunga Antonio Conte-a'n player langsar a lakluh hmasa ber a ni. Rudiger chuan, "Ka tan chuan hun lawmawm a ni, player zawng zawng hian hetianga club ropui zawm theihna hun ṭha hi an hmu vek lo," tiin a sawi.
Germany tana match 17 khel tawh Rudiger chuan sawi chhunzawmin, "Premier League hi khawvela league ṭha ber a ni a, chumi champion team Chelsea tana khelh hlan ka nghakhlel tawh hle. Antonio Conte kaihhruaina hnuaiah hmasawn theih ka inring a, season tawpah nomawi kan chawi ngei ka beisei," a ti.
Tu nge Rudiger?
Feet 6 leh inches 3-a sang Rudiger hi centre back a ni a, kum 2012 aṭang khan Stuttgart first team-ah inlan ṭanin Germany tan kum bithliah inelna hrang hrangah a inlan chho zel bawk.
Kum 2015 khan Bundesliga club aṭang hian Serie A club Roma a zawm, Italian club tan hian season hnih chhungin match 72 a khel hman a, tlarhnungah player rinrawl niin season hmasa khan a club hi league-ah pahnihna a nihpui.
Beiseina nen
Tun hmain Rudiger-a khup hi ṭum thum ngawt zai a ni tawh a, season hmasa khan inelna hrang hrangah Roma tan yellow card vawi riat leh red card vawi hnih a hmu bawk!
Blues manager Conte-a'n tlarhnung laia chhawr turin David Luiz leh Gary Cahill a nei lawk sa a, Rudiger hi rinrawl ber a ni nghal kher lo mai thei. Conte hian a player thar hi duhthusama hmang tur chuan khelmual chhunga awmdan tur a hrilh ngun a ngai khawp ang.
Chelsea hian tun nipui transfer chhunga an lakluh tum langsar striker Romelu Lukaku chu Manchester United lakah an hloh tawh a, tunah hian Monaco midfielder Tiemoue Bakayoko, Juventus wing back Alex Sandro leh Real Madrid striker Alvaro Morata te chu Stamford Bridge-a seng luh tumin an hel mek.