Blasters leh Stuart Pearce an inhnaih
Indian Super League club Kerala Blasters chuan season thara an coach ni turin England international ṭhin Stuart Pearce chu inbiakna an neihpui mek. Blasters hian an duhthlan hmasa chu season hman zawh taka final luhpuitu coach Steve Coppell a ni a, mahse beisei angin inbiakna a kaltluang lo.
Sachin Tendulkar-a club hian Pearce leh Scotland coach hlui Billy Mckinlay an biak chhunzawm a, England tana vawi 78 inlan thei Pearce-a lam an hawi. Kum 55-a upa manager hian a vanglaiin a hunlaia club langsar Nottingham Forest, Newcastle United, Manchester City leh West Ham tan pawh a lo khel tawh a, tawnhriat a ngah tawh hle.
Inkhel a chawlhsan hnuah coaching lamah a kal a, Manchester City chu 2005-07 inkar khan a enkawl a, Engand U21 manager nih chhunzawmin 2009 UEFA U21 Euro final a hruai thleng. Fabio Capello enkawlna hnuaia England an awm lai khan coaching staff zingah a lo tel tawh a, 2014-15 inkara Nottingham Forest a enkawl hnuah club enkawl erawh a nei tawh rih lo.
Blasters hian senior player pahnih an chelh theih zingah CK Vineeth an chelh hnu lawkin defender Sandesh Jhingan chu an club-a kum thum dang cham chhunzawm turin an chelh leh tawh bawk. India international hian kum thum chhung hian vaibelchhe 3.8 a hlawh ang.