Quarterfinal lut hmasa ber Kuznetsova
Nimin tlai khan Wimbledon last 16 khelh ṭan a ni a, hmeichhe singles khelh hmasak niin Svetlana Kuznetsova chuan Agnieszka Radwanska hnehin tennis tournament upa berah hian quarterfinal lut hmasa ber a ni.
Court 3-a inkhelah seeded pakuana Kuznetsova hian darkar khat leh minute 29 chhungin seeded pasarihna Radwanska lakah 6-2, 6-4 in hnehna a chang.
Grand Slam nomawi vawi hnih chawi tawh Kuznetsova hian winners vawi 37 vuain aces vawi hnih a siam a, a khingpui service chhuhsak theihna hun ṭha vawi kua a hmuh zinga ṭum thum a hmang ṭangkai thei a ni.
Seeded pakhatna Angelique Kerber, French Open champion Jelena Ostapenko leh seeded pahnihna Halep te pawhin nizan khan last 16 match an khel a, he thu buatsaih lai hian result kan hre hman lo.