Ruatthara hoin India U23 an chak
AFC Under 23 Qualifiers khel tura inbuatsaih India Under 23 chuan Pathianni zan khan Singapore U23 chu friendly match-ah 1-0 in an hneh - India captain chu Hmunhmelṭha tlangval Lalruatthara niin Aizawl FC defender hi tualchhung football Mizoram Premier League aṭanga inzir chhuak a ni.
Chao Chu Kang Stadium, Singapore-a inkhelah Mizo pathum Ruatthara, Jerry Lalrinzuala leh Daniel Lalhlimpuia ten inkhel bul an ṭan a, Lallianzuala Chhangte chu second half-ah tlan luhtir a ni bawk.Sairuatkima leh Jerry Mawihmingthanga ten bench lamah hun an hmang tluan thung. July 12-ah ram pahnih hian friendly match an khel leh ang.
India captain Mizo
India senior coach Stephen Constantine-a'n India U23 a kaihruai a, Singapore an pan hma hian Delhi-ah ni 18 chhung zet training an nei. British coach-in Mizo tlangval paruk Lalruatthara, Jerry Lalrinzuala, Daniel Lalhlimpuia, Jerry Mawihmingthanga, Lallianzuala Chhangte leh Sairuatkima te a hruai a, Mizo mipui tan lawmna tham a ni.
Pathianni tlaiah India U23-in Singapore nen friendly match an khel ta chiah a, captain armband hreng chungin Lalruatthara a inlan. Stephen Constantine hi Jerry Zirsanga leh Malsawma te India tana lo inlantir tawhtu kha a ni a, Hnahthial tlangval Jeje Lalpekhlua chu India senior team tan Iran lakah captain armband a lo hrentir tawh bawk.
Inkhel chu
Mikhual team India-in inkhel bul an ṭan ṭha zawk a, minute 14-na lekah freekick an hmu. Mizo tlangval Daniel Lalhlimpuia chu freekick pet turin a pen chhuak a, Bengaluru FC striker tan goal khungna remchang ni mah se Singapore defender thin phu tirangtu bak a tling zo lo. Singapore an harh zawk a, Ikhsan Fandi hmangin a zawn zatin chance an nei nghal, an mamawh goal erawh an hmu thei bik lo.
Minute 38-naah Lalruatthara foul avangin Singapore-in freekick an hmu a, penalty box aṭangin hnai viau mah se a vawi thum nan chance an khawhral. Singapore-in khelmual laiah ball in pass kual an uar laiin India-in mual sir aṭangin an nawr reng thung a, chawlhlawk hman hmaa inkhel thunun zawk chu mikhual tlangvalte an ni.
India chakna
Minute 49-naah East Bengal midfielder Nikhil Poojari lakchhuah a ni a, aia lut chu Lallianzuala Chhangte niin Lunglei rawlthar hi a hmuhnawm nghal. Minute 51-naah DSK Shivajians forward hian Singapore penalty area-ah ball hlauhawm a thlawh lut a, defender-te petchhuah ṭhat tawk loh chu Daniel-a keah a tla. Serchhip rawlthar hian Lianzuala tan siamsak nghal mah se India senior team tan pawha goal lo khung tawh rawlthar goal khung hi offside vanga pawm a ni lo.
Lunglei rawlthar Lianzuala'n minute 76-naah hnai set sawt aṭanga a khung loh hnuin India-in goal an khung ta nge nge a, kum 21-a upa Germanpreet Singh chuan Nanda Kumar hnen aṭanga a ball hmuh ṭha tak chu nalh zetin goal-ah a chantir. Singapore tan si phurh sut turin hun a awm tawh lo a, India-in 1-0 in hnehna an chang.
Constantine a lawm
India coach chuan, "Ka naute kha international match-ah a vawi khat nan an khel ho a, an khelh dan khan minti lawm takzet a ni. Vawiina kan hriat sak reng tur chu Singapore kan hmachhawn hma hian team angin an la khel ho ngai lo," tiin khel ho ngai lo nichunga a naute khelh dan chuan a tih lawm thu a sawi.
English manager chuan sawi chhunzawmin, "Khualmuala international match-a hnehna chan hi chu engtiklai pawhin a nuam ṭhin. Inkhelh ṭantir aṭang khan ka naute khan chak duhna thinlung nen an khel nghal a, thiamna, chakna leh tharumah kan chungnung zawk vek a ni. Mahse, vawi khat chaka chawl hahdam mai tur kan ni lo. Hna tam tak thawh turin min la hmuak a, zaninah hian zirlai kan zir tel bawk," a ti a, an chance neih goal-a chantir dan chu an zir tur pakhat a nih thu a sawi lang.