Neuer dahsangtu Ancelotti

Bayern Munich coach Carlo Ancelotti chuan a keeper Manuel Neuer chu player ṭha bik a nih thu a sawi a, Germany international hi 'computer' nen a khaikhin hial!

Germany captain hi a kephah zai a ni a, tunah hian team training a la zawm thei lo. Season thar inbuatsaih nana China leh Singapore-a an zin hunah pawh a la tel ve lo ang. Heng ram pahnihah hian Bayern hian Arsenal, AC Milan, Chelsea leh Inter Milan te an inkhelh pui dawn a ni.

AC Milan, Chelsea leh Real Madrid pawh enkawl tawhtu Ancelotti kaihhruaina hnuaiah Bayern hian season hmasa khan Bundesliga nomawi an chawi a, season tharah hian an champion leh thei a nih chuan a zawna a vawi rukna tur a ni ang.

Kum 31-a upa Neuer hian season liam ta khan Bundesliga match 26 a khel aṭangin clean sheet vawi 14 a nei a, goal 13 a chhuah thung. Hliam a nei emaw, hahchawlh a mamawh a nih hran loh chuan inkhel bul ṭan tura thlan zingah hmaih a ni ngai lo. April thlaa a ke phah hliam vang hian tun thlengin a la inkhel thei lo thung.

Italian manager Ance­lotti chuan an keeper chung­­chang sawiin, "Kei­ni team hi chuan goal-ah conputer kan nei a, hei hian inkhel result a thlak danglam ṭhin a ni. Ani hi chuan jersey a hak tawh hi chuan a kut, ke leh taksa bung hrang hrang hi a mala awm loin pumkhat vek a ni ṭhin," tiin khawl ang maia ṭha a nih thu a sawi.