Fapa tlanbo a haw leh ta Rooney - United legend nge Everton zawk?

Manchester United chuan an website banner-a Wayne Rooney lanna an la thla tawh a, club legend a nih thu an ziahna erawh langsar taka pholan a la ni. Ni e, Rooney hi 'United legend' a ni a, Liverpool tlangval hi pawn lam aṭanga a lan dan chuan United rawng sen ngeia chulh chhuah vek a ni a, chhung lamah erawh Everton hmangaihna nena pawl a ni.

Liverpool-a piang

Croxteth, Liverpool-ah Rooney hi Oct­o­ber 24, 195 khan Wayne Sr leh Jea­nette inkarah a piang a, football ngaina chhungkuaa piang a nih avangin duh thlan tur pahnih chiah a nei - Liverpool FC ṭan emaw Everton FC ṭan a ni.

English striker nu leh pa te hi Evertonian an ni a, hei vang hian Rooney-a'n a naupan laia Liverpool FC hnar chunga Everton FC a zawm chhanah sawifiah thui a ngai lo. Rooney hian Copplehouse Boys aṭangin bul a ṭan a, goal chu hna berah neiin nuam a ti em em a, amah hmu fuhtu Everton scout Bob Pendleton chuan, "Rooney ka hmuh ṭum hi ka hnathawh hun chhunga hun pawimawh ber a ni," tiin a sawi.

Pendleton hian kum 1948 aṭangin Everton inkhel hi hmaih loin a en a, club scout sulhnu nei ṭha ber zinga mi niin a hming chawiin Everton training ground pawh vuah hial a ni. Toffees football hrechiangtu hian, "Rooney ka hmuh hmasak berna hmun chu a ni a, kum kaw mi lek niin goal khung tura piang a ni ber. Naupang zakzum tak a nih avangin England goal khungtu ropui ber zinga mi a nih theih ka beisei lo a, amaherawhchu kum hnih hnuah erawh rin­hlelhna ka nei tawh lo," tiin Pendleton chuan tun hun hi a hmuh thlen phak thu a sawi.

First Love

Rooney-te chhungkuain Everton an ṭan satliah lo a, an tuichilh. Hemi chhung­kua aṭanga seilian Rooney-a'n a hmangaih hmasa ber Everton tana bul a ṭan bawk avangin an inzawmna chu a thuk lehzual. Naupang hma thlir thui bik lo Rooney-a'n 2002 FA Youth Cup final-ah 'Once a Blue, always a Blue' tih T-shirt pho lang chunga a goal khung a lawm chu a rilru chhungril taka a tih ngei a rinawm. Tunlai ṭhalai social media kaltlanga biahthu inhlan ang nen hian tehkhin theih a ni a, a hnu lama nghawng a neih theih dan an dawn pha lo a ni.

Everton ṭantuten Rooney an ngaina sawt a, Premier League goal khung thei naupang ber ni tura match 30 chak zawn tawh Arsenal lama goal a khung a hnuah phei chuan an chhul chhuak rawlthar duhawm hi an chhuang lehzual. Amaherawhchu Sir Alex Ferguson sawmna duhawm tak chu Rooney tan hnawl phal chi rual a ni lo a, hlawhtlinna san zawk chan duh vangin kum 2004 khan Manchester United a zawm.

'Once a Blue, always a Blue' tih kawr hatu Rooney-a'n kawr sen a ha chu Everton

ṭantuten an hrethiam thei lo. Goodison Park-a 'hero' hi phatsantua chhuah a ni a, Everton ṭantute chuan rilru na takin 'kan thinlungah i thi tawh' tih banner an tar chhuak a, Rooney a thinlung a dam bik lo ang. Amaherawhchu Rooney tan kawng thui zawk zawh tur chuan rilru paukhauh a ṭul a ni.

United Legend

English striker Rooney hian United hi Premier League nomawi vawi nga chawipuiin Champions League-a a champion pui bakah UEFA Europa League (1), FA Cup (1), League Cup (3) leh FIFA Club World Cup (1) ah te champion puiin goal 253 a khung a, Red Devils tana goal khung tam ber a ni.

England tan pawh Rooney hian kum 17 leh ni 317-a upa a nihin goal a khung a, ram tana goal khung thei naupang ber a ni. Three Lions tan hian goal 53 khungin ram tana goal khung tam ber a ni bawk.

Rooney hi United tana a sulhnu ropui tak avang hian legend a ni a, amaherawhchu a phu tawka ngaihhlut erawh a ni dawn lo. A chhan chu Rooney hian langsar takin ṭum hnih United hi chhuahsan a tum a, October 2010 khan United chu tum sang tawk loah a chhuah a, kum 2013 khan ṭawngkaa chhuah dilin an hmelma Manchester City hial pawh a zawm hreh loah ngaih a ni.

United captain hlui Rooney hian Sir Bobby Charlton, George Best, Denis Law, Eric Cantona leh Cristiano Ronaldo te aiin goal a khung tam a, chutichung chuan Old Trafford pawna 'Holy Trinity' milim an tih mai Sir Bobby, Best leh Law te angin thil lian tham a hnutchhiah chhunzawm a rinawm loh. Chutihrualin United player ropui zingah erawh chhiar tel a ni kumkhua tawh ang.

Hmangaih hmasa bawk

Everton a zawm leh takah chuan Rooney a inpuang a, Toffees legend Duncan Ferguson anga jersey no. 18-a bul ṭana jersey no. 10-a hun khar tur chuan, "Duhthlang thei dinhmunah ka ding a, sawmna hi hmun hrang hrang aṭangin dawng mah ila Everton-in min duh tih ka hriat khan hmun dang ka hawi tawh lo," tiin a seilennaa a let leh chu a duhthusam a nih thu a sawi.

Kum 31 mi Rooney chuan, "Kum 13 chhung ka ngawi tawh a, tunah chuan ka zep dawn tawh lo. In lamah chuan ka fate nen Everton mut kekawr ngat kan ha ṭhin. Kum 13 liam ta ang tho khan kawr pawl ha chunga khelmuala penchhuah hi ka tan a la hlu reng a ni," tiin engtiklaimahin Everton a nghilh ngai loh thu a sawi.

Everton legend tur?

Rooney hian Everton tan match 67 a khel tawh a, goal 15 a khung tawh. Manchester United leh England tan sulhnu nei ṭha mah se Toffees tana legend ni tur khawpin a la khel tam tawk lo.

Amaherawhchu football khawvela hming langsar tak hian Everton-a hlawhtling taka a footballer career a titawp a nih chuan legend zinga chhiar tel a ni ang.

United-a nomawi chawi theih zawng zawng chawitu Rooney chuan, "Everton hian nomawi an chawi a ṭul a, chumi tur chuan ke an pen a ṭul a ni. Kum kua mi lek ka nih laia 1995 FA Cup Final kan khelh kha ka la hre reng a, kha kha nomawi kan chawi hnuhnun ber a ni. Nomawi ka chawi pui thei a nih chuan ka career-a ka thlen san lai ber a ni ang," tiin a sawi.

Red Devils ṭantute tan hriat nuam a ni lo thei a, amaherawhchu Rooney hian Everton hi nomawi a chawi pui a nih chuan United tana Champions League nomawi a chawi ai pawhin a ngai hlu zawk tihna a ni.

An pawm ang

Everton ṭantuten Rooney hi phatsan­tuah an ngai a, tunah erawh an nem ṭan tawh. Kum 2015-a Toffees striker hlui Duncan Ferguson puala inkhel buatsaih a nih khan Rooney hi kawr pawl hain a inlan a, club chairman Bill Kenwright leh supporter ten an lawm thiam hle.

Chutihrualin Everton ṭantu tam tak erawh Rooney-a'n a chhuahsan avanga ser awm a la reh loh avangin an rilru a hnual a, amaherawhchu Rooney hi goal nena a kir a nih ngat chuan a thinlung na hi thawi damin a awm ang.

Rooney-a'n Everton tan kum hnih contract a ziak a, chona lian a hmachhawn dawn tih hriain nipui chawlh pawh hmang loin training a nei hma. Toffees lamin United captain an lakluh hma hian player panga lakluh nan pound maktaduai 90 an seng tawh a, Rooney telna Everton hi season tharah an danglam ngei tura beisei a ni.