Austrian GP-ah Bottas a chungnung

Pathianni zana tlan zawh tak Formula 1 Austrian Grand Prix-ah pole position aṭanga bulṭantu Valtteri Bottas-a'n hnehna a chang. Mercedes driver hian Formula 1 inelna huangah vawi hnih hnehna a channa chiah a ni a, a hnungah hian driver championship hmahruaitu Sebastian Vettel a thleng.

World champion ni chunga chawl ta Nico Rosberg thlaktu Bottas hian lap 71 an tlan zawh hnuah Vettel aiin second 0.658 in a thleng hma zawk. German driver Vettel erawhin palina Lewis Hamilton chu point 20 zetin an tlansan thei ta.

Mercedes driver Hamilton chu qualifier lamah a cheṭha tawk lo a, a takah pariatna aṭangin bul a ṭan. World champion vawi thum ni tawh Hamilton hi tlan ṭha viau mah se Red Bull driver Daniel Ricciardo a tlan pelh theih miau loh avangin palinaah a lungawi a ṭul. Ricciardo hi tun hnai intlansiak hnuhnung pangaah podium a lawn phak vek!

Kum 2007 champion Kimi Raikkonen chu Romain Gros­jean hmaah thlengin pangana a ni a, Grosjean hnungah hian Force India driver pahnih Sergio Perez leh Esteban Ocon te an thleng bawk.

Red Bull car khalh chunga world champion vawi li ni tawh Vettel hian point 171 hmuin driver championship hmahruaitu a nih chhunzawm a, a hnungah hian point 151 hmutu Hamilton awmin tun season aṭanga Mercedes car khalhtu Bottas (136 points) chu pathumna a ni.

Team championship lamah Mercedes-in point 287 hmuin pakhatna an ni mek a, pahnihna chu point 254 hmu tawh Ferrari an ni. India team Force India chuan point 89 hmuin team 10 inel zingah palina an ni mek.

Eng nge an sawi?

Kum 27 mi Bottas chuan, "A tir aṭangin intlansiak ka thunun thei a, a tawp thlengin ka dinhmun a ṭhat phah a ni. Ka career-ah vawi hnih ka chakna chiah a ni a, ka hmuh dan chuan Formula 1-ah nun bul ka ṭan ve chauh a ni," tiin a sawi.

Championship hma­hruaitu Vettel chuan, "In­tlansiak nuam leh ngaih­nawm tak a ni a, pa­khatna nih tumin tlan mah ila ka dinhmunah ka lungawi. Lap khat chu tlan belh ni ila Bottas kha ka tlan pel thei mai thei, mah se pahnihna nih hi a chhe lo e," a ti.

July 16 tlaiah Formula 1 British Grand Prix tlan a ni leh dawn. Silverstone-ah hian tun hnai kum thum chhung chu khawtual driver Hmilton-a'n hnehna a chang vek. Team championship hmahruaitu Mercedes tan an dinhmuh sawh ngheh theihna hun a ni dawn a, Hamilton tan an chunga awm Ferrari driver Vettel hnaih theih­na kawng a inhawng bawk ang.