Wimbledon khelhna grass a chhia?

Tennis tournament upa ber Wimbledon khel mekah Grand Slam champion hnem ber Roger Federer leh Novak Djokovic te chuan an khelhna court-a grass phah chu a ṭhat tawk loh thu an sawi chhuak!

Serbian tlangval Djokovic hian Centre Court-ah Ernests Gulbis hnehin third round a paltlang a, he mi ṭum hian ball sawh (ting) dan chu a danglam fo tih a sawi a, inkhel dangah Federer leh a khingpui Mischa Zverev te chu an tlu ve ve bawk! Player ṭhenkhat pawhin Centre Court chauh ni loin court dang pawh a ṭha tawk a ni tiin an sawisel tawh.

World number 4 Djokovic chuan, "Round hmasa pahnihah kha chuan a danglamna vak ka hre lo, mahse third round-ah kha chuan ball kal dan kha a inthlak fo tih chu chiang takin ka hria a ni. Centre Court chauh ni loin court dangah pawh sawiselna a awm nual," tiin a sawi.

Grand Slam vawi 18 champion tawh Federer chuan, "A nal a, tawlh palh a awl hle. Court grass kha inkhelh nan a him lo ka tihna a ni lo a, chutihrualin siamṭhat theih deuh tur chu a ni. Tennis ball ni lo thil dang ngaihtuah tel a ngaih chuan ṭha taka khelh a harsa a, hliam neih palh pawh hlauhawm tak a ni," tiin a sawi.

Nizan khan Wimbledon last 16 hi khelh ṭan niin mipa leh hmeichhe player langsar an inlan a, he thu buatsaih lai hian result kan hre hman lo. World number 1 Andy Murray, Rafael Nadal, Djokovic leh Federer ten third round an paltlang vek a, tun hma lama kan hmuh fo tawh 'big four' inelna hmuhnawm tak ang khan kan hmu leh ngei tura ngaih a ni.