Player huaisen Nadal a chuai

Wimbledon quarterfinal luh tumin Rafael Nadal-a'n huaisen leh rim takin Gilles Muller a bei let a, mahse Spain tlangval thawh­rimna leh huaisenna hi Luxembourg tlangval laka hnehna chan nan a tawk zo lo. Darkar li leh minute 47 an inkhelh hnua lawm zawk chu Muller a ni.

Thawhṭanni zan Court One-a inkhelah Grand Slam vawi 15 champion tawh Nadal hi 6-3, 6-4, 3-6, 4-6, 15-13 in a chak lo zawkah a ṭang. Kum 34 mi Muller tan Wimbledon-a quarterfinal a luhna hmasa ber a ni a, vawiin tlai dar 4:00-ah Roberto Bautista Agut hnehtu seeded pasarihna Marin Cilic nen an inhmachhawn leh ang.

Inkhel rei ber
Kumin Wimbledon khelh tawh chinah Nadal leh Muller te inkhel hun chhung a la rei ber, darkar nga a tlin lohna chu minute 13 chiah a ni. An inkhelh zawha inhmachhawn zui tur Novak Djokovic leh Adrian Mannarino te inkhel tur chu nimin tlai khan sawn phah hial a ni.

World number 2 Nadal-a'n set hloh loin last 16 a inhlangkai a, mahse Muller lakah erawh set hmasa pahnih a hloh nghal! Chak lo tura a lan hnuah Nadal hian set hnih a la zawn ve leh mai a, chak zawk hre turin set ngana khelh a ngai.

Set ruknaah Muller hi a din­hmun ṭha zawkah a ṭang, 5-4 a hmahruaiin Nadal service chhuh­sak thei dinhmunah a ding zui a, match point ṭum hnih a hmuh erawh a chhawr ṭangkai thei bik lo!

Player pahnihin an service an hloh duh lo a, darkar li chuang an khelh hnuah thahrui ngah Nadal hi chak tura rinkai zawk a ni leh tawh. Mahse, Muller-a chetsual duh miau loh avangin a tawpah Nadal a chesual zawkah a ṭang a, a vawi thum nana a service hlohin Muller-a'n 15-13 a set lain hnehna a chang.

Inelna dangte ang lo takin Wimbledon-ah hian deciding set khelh a ngaihin (mipa tan set ngana, hmeichhe tan set thumna) 6-6 a nih hnuah, an in service chhawk a, game hnih la zawn thei hmasa zawk zawkin hnehna an chang ṭhin a ni.

Service ṭha leh volley mawi tak tak lantir chunga hnehna changtu Muller chuan, "A hah­thalk takzet, match point ka hmuh hmasak kha chhawr ṭang­kai thei lo mah ila game hnu­hnung berah kha chuan rilru 100% ka pe thei a, a vannei zawk­ah ka ṭang ta a ni," tiin a sawi.

Grass-ah a harsa
Kum 31 mi Nadal hian Wimbledon nomawi vawi hnih a chawi tawh a, tun hnaiah erawh a thleng sang ngai tawh lo. Kum 2011 final-a Novak Djokovic a hneh loh hnuah quarterfinal a la in vaw kai leh miah lo a ni.

Kuminah Nadal-a'n season duhawm a hmang a, Grand Slam hmasa ber Australian Open final khelin a chak lo a, French Open-ah erawh a vawi 10 nan nomawi a chawi thei - All England Club-ah pawh hian rinkai a ni phak. Tournament bul pawh a ṭan fuh hle, mah se kum dang ang bawkin a zuih ral.

Chak lo mah se Nadal hian lawm a hlawh a, player ropui hian winners a vuak lai leh aces a siam laiin mipui thawm a ṭha ṭhin hle. Nadal chuan, "Min ṭantute vangin boruak nuam tak hnuaiah ka inkhel thei a, court chhungah khan ka theihna zawng zawngin khel mah ila Muller khan chak zawk nih phu khawpin a khel chhuak zawk a ni," a ti.

Nadal chuan sawi chhun­zawmin, "Fourth round-a thlak mai hi ka tum hran lo, tun hnaia ka khelh ṭhat ber ṭum ni mah se ka thlen chin hi a sang tawk lo. Ball hnuhnung ber ka vuak thleng khan ka theihtawp ka chhuah a, kei chuan chak lo zawk nih hi ka duh ngai lo. Tun hi ka tawpna tur a la ni lo," tiin a sawi.