Club hlun Dinthar FC inlan hun

Mizoram Premier League cham­­pion hmasa ber Dinthar FC-in Lalbiakliana Memorial MFA Super Cup 2017 first round khar nan 1st Bn MAP Football Academy an hma­chhawn dawn a, Maimawms hian team 32 zingah inhlankai an tum dawn a ni.

Vawiin hian inelna neih chhun­zawm a ni dawn a, Rajiv Gandhi Stadium-ah first round khelh a ni ang a, Lammual lama inkhel pathum erawh second round a ni tawh thung.

Dinthar thar

Dinthar FC-in tun season-a an match hmasa ber an khelhna tur hmun hi RG Stadium a ni a, tlai dar 3:00-ah 1st Bn MAP FA an khelhpui dawn. Club pahnih hi MPL ṭan hma season-a Mizoram league sang ber ni ṭhin first division league-ah an awm ho a, tunah erawh club dinhmun a inthlau ta.

Second division club 1st Bn MAP Academy hian footballer ṭha an chher chhuak zel a, division sang zawk club-ah an chhuah zel avangin tualchhung football team ṭha zinga chhiar tel an harsa tawh. Dinthar FC erawh an indin thar a, tun season-ah nomawi chawi ngei an tum.

Dinthar FC hian an veng pa Lal­hlupuia Sailo kaihhruaina hnuai­ah awmze nei takin player an la khawm a, an squad thlirin dah hniam theih an ni lo. MPL5 best goal­kee­per Malsawmdawngzela chu Bethle­hem Vengthlang aṭangin an lalut a, Chanmari West midfielder Lal­biak­­­hlua bakah Zo United aṭangin an rinrawl R. Lalthantluanga, Mal­sawma Chhangte, Lalnunpuia, C. Lal­dinmawia, H. Malsawmtluanga leh Lalnun­sanga (Talea) te an ziak lut bawk.

Chhinga Venga beisei pha lo Lalramliana Varte-in hming a chher tawhna Dinthar FC a bel nawn leh a, an player neih sa Michael Lalremruata, Samuel Laltlanthanga, Lalbiaknia leh VL Chhanhima te bakah rawlthar beiseiawm Lalbiakzuala, Joseph Lalṭhafela leh R. Lalnunmawia te an chelh thei bawk.

Dinthar FC coach Lalhlua chuan, "Beisei sang tak kan nei a, ṭha takin bul kan ṭan ngei kan ring. Kan khingpui tur 1st Bn MAP hi team hmachhawn châkawm an ni lo a, tawhkhirh tak an ni ang. Chutihrualin heng team hi kan theihna fiahna atan an pawimawh a, kan theihna zawng zawng nen kan khel ang," tiin Vanglaini a hrilh.

1st Bn MAP coach Lalnunzira chuan, "Transfer laiin player ṭha kan chhuah nual a, season dang kan pha dawn lo," tiin a sawi a, ṭawng fimkhur viau mah se khelmuala Dinthar FC barakhaih chu an châk zawng tak a ni ang.

Inkhel dang

Nikum MFA Super Cup semifinalist Chawnpui FC-in an match hmasa berah Khatla South an hneh hram a, vawiin Lammual match hmasa berah first division club hian Armed Veng South an hmachhawn dawn. Third division club AVS hian an match hmasa berah Raphael FC 4-0 in an sawp a, Chawnpui lakah harsatna an thlen thei ang.

Lammual match hnihnaah Sailam FC leh Melriat FC an khel dawn a, Sailam striker Lalrinkima'n Ramhlun North 4-1 a an hneh ṭumin goal li a khung a, he player hi en bik a fuh ang.

First round-a goal 10 khung thei Durtlang Leitan FC hian inelna tikimtu nih an tum lo a, Lungverh FC lakah pawh chak tura rinkai an ni ang.

Vawiin Inkhel Tur
Lammual
Group B - Second Round
10:00 AM Chawnpui FC Vs FC Armed Veng South
Group C - Second Round
12:00 PM Melriat FC Vs Sailam FC
02:00 PM Durtlang Leitan FC Vs Lungverh FC
RG Stadium
Group H - First Round
11:00 AM Ramthar Veng FC Vs Zamuang FC
01:00 PM Chaltlang FC Vs Neihdawn FC
03:00 PM 1st Bn MAP FA Vs Dinthar FC