Bayern-ah James Rodriguez a lut

Liverpool leh Manches­ter United nen sawizawm hlawh viau mah se Real Madrid attacking midfielder James Rodriguez chuan season hnih chhung loan-a khel turin Bayern Munich a zawm a, German club hian a loan hun zawhah an duh chuan a nghetin an lalut thei ang.

Bayern hian James an hawh manah hian pound maktaduai kua an inseng dawn a, a ngheta lakluh an duh chuan pound maktaduai 31 an insen a ngai dawn bawk.

Kum 25-a upa attacking midfielder hian July 2014 khan AS Monaco aṭangin Real Madrid hi pound maktaduai 71-in a zawm a, beisei ang erawhin thil a kaltluang lo. Season hman zawh takah khan Real boss Zinedine Zidane-a'n Isco leh Marco Asensio a thlan zawk avangin league match 13-ah chiah inkhel bul a ṭan ve a ni.

Colombia captain hi 2014-15 season-ah khan tuna Bayern boss Carlo Ance­lotti kaihhruaina hnuaiah Real-ah a lo khel tawh a, inelna hrang hrangah match 46 khela goal 17 khungin assist 18 a nei thei. Amah chhawr thiamtu Italian manager awmna lam pan a thlang hi a mak hran lo.

Bayern chairman Karl-Heinz Rummenigge chuan, "Carlo hian Madrid-ah hlawhtling taka James a lo kaihhruai tawh avangin Bayern-a lakluh ngei hi a duh a ni. Player inher rem thiam tak, goal hmaa hlauhawm em em, goal tam tak siam chhuaka set piece chhawr thiam tak a ni a, ani kan lakluh theih avang hian kan squad kan ṭha sawt tih a chiang hle a ni," tiin James an lalut thei chu a lawm hle.