MPL club-te nge nge...

Nimin khan Lalbiakliana Memorial MFA Super Cup 2017-ah Mizoram Premier League club danglamna a lang. MPL club Bethlehem Vengthlang FC, Chanmari West FC leh Chhinga Veng FC te goal khung zat belhkhawm chu goal 27 a ni.

BVT-in Durtlang FC 10-0 in an sawp a, Chanmari West-in team ṭha SYS Academy, Lunglei 3-1 a an hneh bakah Chhinga Veng-in 14-0 in Zo Dreams FC beiseina an titawp bawk.

Chawngthansanga kaihhruai BVT leh Lalsangzuala Hmar enkawl Chhinga Vengin last 16 an lut a, West Warrior-in HC Zarzoliana hnuaia a vawi khat nan MFA Super Cup-ah hnehna an chang.

BVT ṭha zawk

Bethlehem Vengthlangin an match hmasa bera Aizawl FC Academy Under 18 an khelh ṭumin goal an khung thei lo a, match hnihnaa Durtlang FC nen an inkhel a, team dang an ni tawh.

BVT tan Chanmari West FC aṭanga an lakluh K. Lalnun­zama'n a club thar tana a match hmasa berah minute hnihna lekah goal a khung. Chawngthansanga hoten second division club lakah zahngaihna an lantir duh lo a, goal 9 dang khung belh lehin 10-0 in an chak.

ITI Veng tlangval R. Lalrammawia leh PC Lalṭhazuala ten goal hnih ve ve khungin captain Lal­rammawia, Joseph Lal­sanglura, K. Lalmalsawma, Rameng­mawia leh Lalruatkima ten goal khat ṭheuh an khung bawk.

BVT hian last 16-ah Bawng­kawn club Bethany FC hnehtu FC Venghnuai an hmachhawn dawn a, second division club aiin first division club Venghnuai hi tawh an khirh zawk hmel.

Chhinga Veng an pui

Chhinga Vengin khelmual chhungah thawm an nei lian zel a, match hmasa bera Zarkawt FC 9-0 a an sawp hnuah nimin khan Zo Dreams lamah goal 14 khungin goal an chhuah lo.

Santosh Trophy hnu­hnung bera Mizoram coach Sanga kaihhruai team tan Malsawm­fela'n hattrick a siam a, MS Dawngliana, Lalchhuanpuia leh Lalrinchhana Tochhawng ten goal hnih ṭheuh khungin R. Lalawmpuia, Laldampuia, Zosangliana Sailo, Shalom Lala leh Lalrammuanpuia ten goal khat ṭheuh an khung.

Chhinga Veng hian last 16-ah vawiina Chawnpui FC leh FC Armed Veng South chak zawk an hmachhawn dawn a, goal tam zawk nena quarterfinal thlen an tum ang.

West Warrior an ṭha

Chanmari West FC coach HC Zarzo­liana'n kum tluana training nei SYS Academy hmachhawn an châk loh thu a sawi lawk a, vanduai thei an nih thu sawi lang mah se an player neih ṭhat an chakpui.

West Warrior hian Ramhlun South tlangval Lalnunmawia hmangin minute 11-naah hma an hruai a, minute 65-naah SYS Academy-in an si phurh an sut. Nikumah Chanmari West hian first round-ah Chawnpui FC an hneh lo a, tun ṭumah erawh fiahna an paltlang.

Chanmari West tan Shillong Lajong aṭanga an lakluh Jacob Lalrawngbawla'n minute 74-naah hmahruaina goal a khung a, injury time-ah Chennai City FC player hlui Mawitea'n a goal hnihna leh chak nemnghehna goal a khung.

RG Stadium inkhel dangah Kanan FC-in Hunthar FC 8-0 in an sawp a, Chite FC-in Asanga Memorial FC lehthalin 4-2 in an hneh bawk.

Nimin Inkhel Results
LAMMUAL
Group A - Second Round
Bethany FC, Bawngkawn 0 - 2 FC Venghnuai
FCV : Lalfakzuala Sailo 79'; Israel Ramhmachhuana 83'
Bethlehem VT FC 10 - 0 Durtlang FC
BVT : K. Lalnunzama 2'; Joseph Lalsanglura 16'; PC Lalthazuala 22', 51'; R. Lalrammawia 24', 32'; K. Lalmalsawma 60'; Lalrammawia 70'; Ramengmawia 73'; Lalruatkima 81'
GROUP B - Second Round
Zo Dreams FC 0 - 14 Chhinga Veng FC
CHH : Lalchhuanpuia 18', 77'; Malsawmfela 29', 42', 50'; Lalrinchhana Tochhawng 31', 54'; MS Dawngliana 48', 87'; R. Lalawmpuia 58; Laldampuia 61'; Zosangliana Sailo 73'; Shalom Lala 74'; Lalrammuanpuia 89'
RG STADIUM
Group G - First Round
SYS Academy, Lunglei 1 - 3 Chanmari West FC
SYS : Lalrintluanga 65'
CHA : Lalnunmawia 11', 90+2'; Jacob Lalrawngbawla 74'
Hunthar FC 0 - 8 Kanan FC
KAN : R. Swapna 7', 13'; 85 (P); MS Dawngliana 29'; L.Nengrosiama 52', 76'; Laltanpuia 65'; Michael Lalhruaitluanga 88' (P)
Group H - First Round
Asanga Memorial FC 2 - 4 Chite Veng GSA
ASA : Lalhualhima 2'; Lalmuankima 15'
CHI : C. Lallianmawia 18'; Ramthianghlima 24', 62',73'