Lukaku-a'n training a zawm ta
Manchester United chuan Romelu Lukaku chu Everton aṭangin pound maktaduai 75-in an lalut ta a, Belgian striker hian kum nga daih contract a ziak.
Kum 24 mi Lukaku hian Thawhṭanni khan Drake Stadium, Los Angeles-ah Manchester United training a zawm ve nghal. United striker thar hian season liam taa Zlatan Ibrahimovic-a jersey no 9 a ha ang.
United manager Jose Mourinho chuan, "Romelu hi Manchester United nen an inmil nghal thlap a, khawvel club lian ber a zawm duh hi thil kalphung pangngai a ni. Team tichak thei tur a ni a, amah nena kan thawk dun leh tur hi ka phur hle a ni," tiin a sawi.
Belgian striker man hi pound maktaduai 15-a la pung chho thei tur a ni a, a contract sei zawng hi kum khata pawhsei theih dan a la awm bawk. Lukaku chuan United a zawm theihchhanah a ṭhianpa Paul Pogba a pawimawh thu a sawi lang a, player ṭha pahnih agent hi Mino Raiola a ni. Chelsea-in an player hlui Lukaku lalut turin United sen zat seng ngam mah se United hian Belgian striker agent Raiola hi hlawh an pe tam ngam zawk.
Chelsea hian July 2014 khan Lukaku hi Everton hnenah pound maktaduai 28-in an hralh a, Belgian striker hian a club hlui Blues aiin amah hnawl tawhtu Mourinho pan a thlang.
Lukaku chuan, "Mourinho hnuaia khelh hi kum 10 mi ka nih aṭanga ka châk tawh a ni a, kan inkar a ṭha bawk. Ani hi nomawi chawi thei manager a ni a, hei vang hian a game plan-a ka tel hi ka lawm a, ani nena kan thawk dun leh thei hi ka phur hle," tiin a sawi.
Beligan striker hian Premier League-ah goal 85 a khung tawh. Ke vei lama goal 42 khungin, ke dinglamin goal 24 akhung a, a lu hmanga goal 18 khungin a taksa peng dangin goal khat a khung bawk.
Transfer records
Khawvel transfer lian panga
£89m Paul Pogba Juventus aṭangin Manchester United, 2016
£86m Gareth Bale Tottenham aṭangin Real Madrid, 2013
£80m Cristiano Ronaldo Manchester United aṭangin Real Madrid, 2009
£75.3m Gonzalo Higuain Napoli aṭangin Juventus, 2016
£75m Luis Suarez Liverpool aṭangin Barcelona, 2014
Romelu Lukaku Everton aṭangin Manchester United, 2017
British club inkara transfer lian panga
£75m Romelu Lukaku Everton aṭangin Manchester United, 2017
£50m Fernando Torres Liverpool aṭangin Chelsea, 2011
£47.5m John Stones Everton aṭangin Manchester City, 2016
£44m Raheem Sterling Liverpool aṭangin Manchester City, 2015
£37.1m Juan Mata Chelsea aṭangin Manchester United, 2014