Sanchez-a'n chhuah a dil lo - Wenger

Arsenal manager Arsene Wenger-a'n a star player Alexis Sanchez chuan club chhuhasan a dil loh thu a sawi a, contract thar an ziah a beisei thu a sawi tel bawk.

Premier League season hmasa a goal 24 khungtu Sanchez hian Emirates Stadium-ah season khat daih bak contract a nei tawh lo a, tun nipui transfer chhung hian chhuak tur anga sawi thawm a ring hle. German champion Bayern Munich leh Pep Guardiola kaihhruai Manchester City te chu amah ngaihventu langsar an ni.

Chile international hi Confe­derations Cup-ah a inlan avangin Gunners player dangte aiin chawlh pek rei bik a ni. Hei vang hian season thar inbuatsaih nana Gunners zinna Sydney-ah a hmel hmuh tur a la awm ve lo.

Australia-a thuthar theh­khawmtute an hmachhawn ṭuma zawhna an dawn langsar chu 'Sanchez hian chhuah a dil em?' tih a ni, zawhna chhangin Gunners manager Wenger chuan, "Dil lo, Sanchez hian a hun hnuhnung a hmang tih hi fiahna a awm lo. Tun nipui chhung emaw season laklawh lai emawin contract a pawh sei kan beisei," a ti.

"Player hi contract nei lai a ni a, a contract neih lai hi zah sak kan duhin ani pawhin a zah ngei ka beisei," tiin a player neih lai zinga hriam ber pakhat Sanchez chu chhuah a tum loh hmel hle.

City nena sawi zawm a nih chungchang sawi zuiin Wenger chuan, "Ka ngaihdan a la ngai reng, Premier League lama kan elpui hnena player ṭha hralh chu tih chi a ni lo, ka duh ngai lo ang," a ti.

French manager hian tun hmain a striker Robin van Persie chu Manchester United lakah a hralh tawh, Dutch international hlui hian United tana a season hmasa berah league goal 26 khungin Premier League nomawi a chawi pui - Wenger hian a tihsual ngai tihsual nawn a tum lo a nih hmel hle.

North London club hian tun hnaiah Lyon aṭangin Alexandre Lacazette an lalut tawh a, Ni­ngania Sydney FC nen friendly match an khelh hunah kum 26 mi Lacazette hi a inlan ang.

Gunners hian defender Sead Kolasinac leh Lacazette te bakah player thar neih belh an la tum ngei niin a lang. French Ligue 1 champion AS Monaco duhlai forward Kylian Mbappe leh midfielder Thomas Lemar te chu hming langsar an ni.

Kum 67-a upa Wenger chuan, "Mbappe hi kum 18 mi chauh a la ni a, tunah hian Europe-a club lian tam takin an hnena khel turin an duh tawh, a duh a nih chuan a duh lam lam a hawi thei a ni ber. Kan ngaihven tih hi phat tur a awm lo, club dang pawhin an hel reng a ni," a ti.