Ferrari-in Vettel chelh zel an duh

Formula 1 team Ferrari chuan an driver chhawr lai Sebastian Vettel chu hun rei zawk atan hman zel an duh a, German driver hian a duh a nih chuan contract thar ziahpui tura an inpeih thu an sawi.

Red Bull car a khelh laia world champion vawi li ni thei Vettel hi tun season-ah driver championship hma­hruaitu a ni mek a, kartawpa tlan zawh tak Austrian Grand Prix-ah khan pahnihna a ni, tuna a contract neih lai hi season tawp rualin a tawp zui ve nghal bawk ang.

Ferrari chairman Sergio Marchionne chuan, "Team lam chuan thutlukna kan siam tawh, cham chhunzawm a duh a nih chuan contract kan ziak ang, a mimal thu a ni," tiin Vettel kuta innghat a nih tawh thu a sawi.

Kum 30 mi Vettel hian a contract chungchang sawi a hmanhmawh loh thu a sawi tawh a, a chhan chu inelna huangah chauh rilru pek a duh vang niin a sawi tawh a ni.

July 16 hian British Grand Prix tlan a ni leh dawn a, khawtual tlangval Lewis Hamilton-a'n a zawna vawi thum hnehna a chan tawhna hmun a ni a, Ferrari tan chona hautak a ni dawn.