Belotti-a'n sawmtu a la nei lo
Torino president Urbano Cairo chuan transfer bazar-a 'hot' ber pawl an striker chhuanvawr Andrea Belotti lakluh tuma dawrtu an la neih loh thu a sawi. Kum 23-a upa striker hi a contract neihlai ang chuan pound maktaduai 88 bawr vela leichhuah theih a ni dawn a, dawrtu erawh a la nei lo.
Cairo chuan, "Italian club niloin Belotti hi lakluh an duh dawn a nih chuan pound maktaduai 88 bawr vel tal an sen a ngai dawn a, a man a san vang hi a ni ang, tun thlengin dawrtu kan la nei lo. Kan hnena a awm hi keichu ka lawm a, a cham zel pawh ka beisei a ni," tiin a sawi.
Torino president-in Belotti chu ram pawn club tan pawisa tam tham taka lei theih an nih thu a sawi laiin Italian club tan erawh lakluh a awlsam loh tur thu a sawi. Cairo chuan, "Ka ngaihdan chuan Serie A club danga kaltir hi thil theih loh tluk a ni a, chutihrual chuan player duhnain nghawng a nei thui khawp ang," a ti.
Italy tan vawi kua inlana goal li khung thei striker hian season hman zawh takah khan inelna hrang hrangah match 38 khelin goal 28 a khung a, Chelsea nen sawizawm mek an ni.